Azərbaycan Memarlıq və İnşaat Universitetində (AzMİU) bu günə qədər 84 iordaniyalı oxuyub. Onlardan 75-i keçmiş SSRİ dövründə, 9 nəfəri isə 2001-2016-cı illərdə təhsil alıb.
Bu fikirlər İordaniya Haşimilər Krallığının Azərbaycandakı səfiri Sami Abdullah Ğoşehlə AzMİU-da keçirilən görüşdə səsləndirilib.
AzMİU-dan bildirilib ki, rektor Gülçöhrə Məmmədova rəhbərlik etdiyi təhsil müəssisəsinin fakültə və ixtisasları, beynəlxalq əlaqələri barədə qonağa məlumat verib. Rektor vurğulayıb ki, ölkələrimiz arasında qurulmuş işgüzar əlaqələr nəticəsində 2011-2016-cı illərdə universiteti bitirən iordaniyalı tələbələrin diplomları öz ölkələrində tanınıb. Hazırda isə İordaniya vətəndaşlarının AzMİU-ya marağı azalıb.
Sami Abdullah Ğoşeh yaxın günlərdə ölkəsinə səfəri çərçivəsində bu məsələ ilə maraqlanacağını xüsusi qeyd edib. Səfir AzMİU ilə İordaniya universitetləri arasında əməkdaşlığın əhəmiyyətini qeyd edib, müvafiq ali təhsil müəssisələri ilə əlaqələrin daha da inkişafında maraqlı olduğunu bildirib.
Görüşdə tələbə-müəllim mübadiləsi, təqaüd və təcrübə proqramları, təlim və layihələr, “ikili diplom”ların verilməsi üzrə əməkdaşlıq ətrafında fikir mübadiləsi aparılıb. Görüşün sonunda səfir universiteti gəzib, Memarlıq fakültəsi ilə yaxından tanış olub.