BAXCP İdarə Heyəti Azərbaycan hökumətini islahatları genişləndirməyə, dövlət idarəetmə xərclərini azaltmağa, manatın kursunun sabitləşdirməyə çağırıb

Dünən Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti iclası keçirilib. İclasda qərarların icrası, ictimai-siyasi vəziyyət və cari məsələlər müzakirə olunub. BAXCP İdarə Heyətinin iclasında Tarif Şurasının elektrik enerjisinin və təbii qazın qiymətlərinin diferensiallaşdırması ilə bağlı qərarının müzakirəsi zamanı bu addımların vəziyyətdən çıxış yolu olmadığı vurğulanıb: "Manatın alıcılıq qabiliyyətinin aşağı düşdüyü bir vaxtda əhaliyə satılan elektrik enerjisinin və təbii qazın qiymətinin qaldırılması əhalinin sosial vəziyyətinin ağırlaşmasına, eyni zamanda ölkədə istehsal və emal olunan məhsulların maya dəyərinə ciddi təsir göstərməklə bahalaşmaya səbəb olacaq". BAXCP İdarə Heyətinin qənaətinə görə, yaranmış vəziyyətdə qiymətlərin artırılması çıxış yolu deyil: "Bu baxımdan hesab edirik ki, "Azərsu", "Azərişıq", "Azəriqaz" və "Azəristilik" səhmdar cəmiyyətlərinin özəlləşdirilməsi əhaliyə satılan qazın, suyun və elektrik enerjisinin maya dəyərinin bir neçə dəfə aşağı düşməsinə səbəb olardı. BAXCP İdarə Heyəti Azərbaycan hökumətini bir daha islahatları genişləndirməyə, dövlət idarəetmə xərclərini nəzərəçarpacaq dərəcədə azaltmağa və manatın kursunun sabitləşdirilməsi ilə bağlı müvafiq qərarlar qəbul etməyə çağırır".

XC