Sevil Mikayılova: Prezident İlham Əliyevin BMT-nin gücləndirilməsi ilə bağlı səsləndirdiyi fikirlər zamana köklənmiş çağırışlardır Siyasət

Sevil Mikayılova: Prezident İlham Əliyevin BMT-nin gücləndirilməsi ilə bağlı səsləndirdiyi fikirlər zamana köklənmiş çağırışlardır

Azərbaycan Prezidenti İlham Əliyevin BMT Baş Assambleyasının 75-ci Sessiyası çərçivəsində BMT-nin 75 illiyinə həsr edilmiş Yüksək Səviyyəli İclasında təşkilatın gücləndirilməsi və müasirləşdirilməsi ilə bağlı səsləndirdiyi fikirlər zamana köklənmiş çağırışlardır.

Bunu Milli Məclisin deputatı Sevil Mikayılova deyib.

Deputat bildirib ki, dünya düzənini qoruyub saxlamaq, beynəlxalq hüququn aliliyini təmin etmək və qlobal inkişafa nail olmaq yönündə BMT-nin potensialı tükənməyib və Azərbaycan Prezidenti də məhz bu potensialdan tam istifadə olunması üçün səylərin göstərilməsinın vacibliyini qeyd etdi:

“Dünyanın 120 ölkəsini öz sıralarında birləşdirən və BMT-dən sonra ikinci böyük təsisat olan Qoşulmama Hərəkatına sədrlik edən Azərbaycan qısa zamanda kifayət qədər təşəbbüskar bir mövqe sərgiləyib. Xüsusilə, dünyanı cənginə almış COVİD-19 pandemiyası ilə mübarizədə qlobal səylərin birləşdirilməsi istiqamətində təşkilat çərçivəsində mühüm olan işçi mühitinin yaradılmasına nail olub. Məhz effektiv idarəçilik və qlobal liderlik bacarıqlarını ortaya qoyan Azərbaycan Prezidenti bu gün beynəlxalq səviyyədə sözü eşidilən dövlət başçısı kimi yüksək kürsülərdən dünyaya səslənir.

Prezident İlham Əliyev Qoşulmama Hərəkatı adından bir daha bəyan etdi ki, narahatlıq doğuran yeni sahələr və çağırışlar meydana gəlib. “Yaranmasının 75-ci ildönümündə biz BMT-nin gücləndirilməsi və müasirləşdirilməsi, Baş Assambleyanın canlandırılması, beynəlxalq sülh və təhlükəsizlik sahəsində təşkilatın demokratik, məsuliyyətli, universal və təmsilçiliyi təmin edən orqan kimi nüfuzunun möhkəmləndirilməsi, habelə müasir geosiyasi reallıqlara cavab verən daha demokratik, məhsuldar, səmərəli, şəffaf və təmsilçiliyi təmin edən orqana çevrilməsi üçün BMT Təhlükəsizlik Şurasında islahatların aparılmasına çağırırıq” - deyə, Azərbaycan Prezidenti bildirdi”.

Deputat vurğulayıb ki, Prezident İlham Əliyevin dayanıqlı inkişafa nail olunması məqsədilə BMT-nin qlobal iqtisadi idarəçiliyi əhatə etmək və qlobal iqtisadi idarəçilikdə rolunun gücləndirilməsi ilə bağlı təşəbbüsü xüsusi önəm daşıyır: “Yeni cağırışların yarandığı bir dövrdə qlobal təsisat olaraq BMT-nin yeni yanaşmalar nümayiş etdirməsi və siyasi iradə göstərməsi problemlərin öhdəsindən gəlmək üçün imkan yaradacaq. Bu mənada BMT-nin işinin canlandırılması, islahatların aparılması və gücləndirilməsi məsələsinin qlobal gündəliyin aktual mövzusuna çevrilməsi əhəmiyyətlidir.

Qoşulmama Hərəkatına sədrlik edən Azərbaycan bu prosesdə öz fəal iştirakı və qlobal əməkdaşlıq çərçivələrini təşviq etməklə BTM-nin işinin səmərəliliyinin artırılması üçün böyük töhfə vermiş olacaq”.