Norveçin Baş naziri Yonas Qar Störe Rusiyadan gələ biləcək təhdidlərə qarşı hazırlıqlı olmağın zəruri olduğunu bildirib.
Xalqcebhesi.az xəbər verir ki, Birləşmiş Millətlər Təşkilatı (BMT) Baş Assambleyasının 81-ci sessiyasında iştirak etmək üçün Nyu-Yorkda səfərdə olan Störe CNN telekanalında Finlandiya Prezidenti Aleksandr Stubb ilə birlikdə panel müzakirəsində iştirak edib.
Rusiyanın Avropanı parçalamağa çalışdığını vurğulayan Störe deyib: "Düşünürəm ki, Rusiya həmişə Ukraynanı dəstəkləyən avropalılara təzyiq göstərməkdə, onları parçalamaqda və aralarında qeyri-müəyyənlik yaratmaqda maraqlı olub".
Norveç xalqına təşvişə düşməyə əsas olmadığını çatdıran Störe qeyd edib: "Bununla belə, biz Rusiyadan gələ biləcək təhdidlərə hazır olmalıyıq. Bu təhdidlər Rusiyaya yaxın ölkələr tərəfindən səsləndirilsə belə, biz onları qiymətləndirməməzlikdən gəlməməliyik".
Rusiyadan qaynaqlanan təzyiq və qeyri-müəyyənliyə qarşı kollektiv fəaliyyətin zəruriliyini vurğulayan Störe NATO-ya üzv ölkələrin bir-biri ilə həmrəylik içində hərəkət etdiyini qeyd edib.

Məryəm Quliyeva