Azərbaycanda fermerlər əkin subsidiyasının bir hissəsini əvvəlcədən əldə edə biləcəklər.

"APA-Economics" xəbər verir ki, bu, Aqrar Subsidiya Şurasının təsdiqlədiyi yeni subsidiya mexanizmlərində nəzərdə tutulub.

Yeni qaydaya əsasən, müəyyən edilmiş meyarlara cavab verən fermerlər əkin subsidiyasının 30 faizini avans şəklində ala biləcəklər.

Mexanizm əkin sahəsi 5 hektardan 100 hektaradək olan, siyahısı müəyyən edilən yazlıq və payızlıq birillik bitkilər becərən və fermer reytinqi 30-dan yüksək olan təsərrüfatlara şamil ediləcək.

Avans subsidiyası üçün müraciət edən fermerlərin sahələri Elektron Kənd Təsərrüfatı İnformasiya Sistemində (EKTİS) bəyan ediləcək.

Sahələrin əkinə hazırlığının monitorinqində isə rəqəmsal və süni intellekt həllərindən istifadə olunacaq.

Qeyd edək ki, yeni subsidiya mexanizmləri Prezidentin 25 may 2026-cı il tarixli sərəncamı ilə təsdiq edilmiş 2026–2030-cu illər üzrə Dövlət Proqramında müəyyən edilən hədəflərə uyğun olaraq qəbul edilib.