"Erməni pilotların meyitini Azərbaycanda dəfn edək"

Millət vəkli Aydın Mirzəzadə noyabrın 12-də Azərbaycan Silahlı Qüvvələri tərəfindən öldürülən erməni pilotlarının xristian adətiylə Azərbaycan ərazisində dəfn olunmasını təklif edir.
Millət vəkili Ermənistanın öz hərbçilərinin cəsədini təmas xəttindəki zonadan götürmək gücündə olmadığını əsas gətirərək belə bir təkliflə çıxış edib:
"Azərbaycan ərazisində vurulmuş Ermənistan hərbi helikopterində məhv olmuş pilotlar xristian adəti ilə Azərbaycanda dəfn edilsin. Noyabr ayının 12-də Ermənistan-Azərbaycan cəbhə xəttində Azərbaycan mövqelərinə hücüm zamanı vurulmuş Ermənistan hərbi helokpteri məsələsi ətrafında proseslər səngimək bilmir.
Düşdüyü çətin siyasi-dipliomatik vəziyyətin ağırlğını dərk edən Ermənistan özünü dolaşdırmaqda davam edir. Bir tərəfdən helikopterin ona məxsus olmadığı bəyan edən işğalçı dövlət, digər tərəfdən proses üzrə provokasiyalarını davam etdirməkdədir. Helikopterin vurulması Ermənistanın Azərbaycana qarşı qəsbkarlığını təsdiq etməklə yanaşı, düşmən ölkənin zəifliyini aşıq-aydın biruzə verir.
Ermənistan normal qonşuluq münasibətlərin qura bilmədiyi kimi öz əsgərinə sahib durmağı da bacarmır. O bu gün hərbçilərinin meyitini götürmək üçün heç bir təşəbbüs göstərmir, bunun üçün müvafiq addımlar atmır. Dünən isə Ermənistan guya, əməliyyat keçirərək, pilotlardan birinin meyitini və onun paraşütünü götürdüyünü elan edib. Ancaq nümayiş etdirilən kadrlarda guya, yanmış hərbi texnikadan götürülən salamat insan bədəni və zərər dəyməmiş paraşüt göstərilib.
Düşmən olsalar da, helikopterdə ölənlər insanlardır və onların da normal torpağa tapşırılmaq hüququ var. Ermənistanın öz əsgərinə sahib çıxmaq istəməməsini nəzərə alaraq, onların nəşinin götürülərək xristian adəti ilə Azərbaycan ərazisində dəfn edilməsini təklif edirəm. Bu işə Azərbaycanda fəaliyyət göstərən xristian icmalarının din xadimlərini cəlb etmək olar".