Kamerunun şərqindəki Zambua ərazisində yerləşən qızıl mədənində torpaq uçqunu nəticəsində təxminən 100 nəfər həyatını itirib.

Xalqcebhesi.az xəbər verir ki, bu barədə yerli sakinlərə istinadən "Cameroun24" portalı məlumat yayıb.

​Hadisə yerində axtarış-xilasetmə işləri davam etdirilir, faciənin dəqiq miqyasını müəyyənləşdirmək hələ ki mümkün olmayıb. Bildirilir ki, uçqun baş verən anda mədəndə çoxlu sayda insan olub.

​Xilasedicilər mürəkkəb şəraitdə fəaliyyət göstərirlər. Uçmayan ştreklərin də çökmə təhlükəsi yarandığından ağır texnikadan istifadə edilmir, dağıntıların təmizlənməsi əllə aparılır.

​İnsident Mərkəzi Afrika Respublikası (MAR) ilə sərhəd yaxınlığında yerləşən qızıl yataqları zonasında baş verib. Burada MAR, Çad, Burkina-Faso və Malidən gələn fəhlələr də çalışdığı üçün həlak olanların şəxsiyyətinin müəyyənləşdirilməsi əlavə çətinliklər yarada bilər.

Məryəm Quliyeva