Dekabrın 5-də Qərbi Azərbaycan İcmasının təşkilatçılığı ilə “Mədəni irs və qayıdış hüququ: Ermənistandan didərgin salınmış azərbaycanlıların mədəni irsinin bərpası – ədalətə, barışığa və sülhə aparan yol kimi” mövzusunda ənənəvi III beynəlxalq konfrans keçirilib.

Konfransın moderatoru Milli Məclisin deputatı, ADA Universitetinin prorektoru Fariz İsmayılzadə tədbirlə bağlı xalqcebhesi.az-a məlumat verib: “Bu, Qərbi Azərbaycan İcmasının təşkil etdiyi III beynəlxalq konfrans idi. Konfransda əsas mövzumuz Qərbi Azərbaycandan deportasiya olunmuş azərbaycanlıların ləyaqətli və təhlükəsiz qayıdışı idi. Bunun üçün hüquqi çərçivələr, hüquqi baza, mədəni irsimizin bərpası, qorunması və talan olunmuş irsin, həqiqətlərin dünyaya çatdırılması müzakirə olundu. Eyni zamanda, konfransda rekord sayda iştirakçı vardı. Xaricdən 60 ölkəyə yaxın iştirakçımız var idi, 100 fərd və onların da 4 paneldə məruzələri dinlənildi. Digər beynəlxalq praktikalarla, beynəlxalq konfliktlərlə, deportasiya olunmuş xalqlarla paralellər aparıldı və Ermənistana ləyaqətli qayıdışın praktik addımları müzakirə olundu”.

Röya İsrafilova