"Orta Dəhliz strateji əhəmiyyət qazanır".

Bunu Türk Dövlətləri Təşkilatının Ağsaqqallar Şurasının sədri Binəli Yıldırım XIII Qlobal Bakı Forumunun açılış mərasimində bildirib.

“Orta Koridor, həmçinin Transxəzər kimi tanınan marşrut Uzaq Şərqi Avropa ilə birləşdirən strateji alternativ kimi getdikcə daha çox diqqət çəkir. Son dövrlərdə baş verən qlobal hadisələr bu alternativ əlaqələrin əhəmiyyətini daha da vurğulayıb. Rusiya ilə Ukrayna arasındakı münaqişə Avrasiya boyunca ənənəvi nəqliyyat yollarına ciddi təsir göstərib. Eyni zamanda İran, ABŞ və İsraillə əlaqəli Yaxın Şərqdəki gərginlik qlobal enerji bazarında və beynəlxalq ticarətdə qeyri-müəyyənliyi artırır. Bu vəziyyət göstərir ki, geosiyasi gərginliklər artdıqda qlobal tədarük zənciri nə qədər həssas ola bilər. Belə bir kontekstdə, müxtəlif və etibarlı nəqliyyat koridorları regional və qlobal iqtisadi sabitlik üçün getdikcə daha dəyərli olur. Orta Dəhliz yalnız iqtisadi imkan deyil, həm də beynəlxalq ticarət sistemində dayanıqlılığın vacib elementi hesab edilir. Buna görə Orta Dəhliz strateji əhəmiyyət qazanır”, - deyə Binəli Yıldırım vurğulayıb.

Binəli Yıldırım qeyd edib ki, Orta Dəhliz Asiya və Avropanı birləşdirən daha sürətli və müxtəlif marşrutlar təklif edir, ölkələr arasında iqtisadi əməkdaşlığı gücləndirir: “Hazırda bu Dəhliz vasitəsilə daşınan yük illik təxminən 5–6 milyon tondur. İnfrastruktur işlərinin davamı, logistika koordinasiyasının yaxşılaşdırılması və gömrük prosedurlarının təkmilləşdirilməsi ilə artım perspektivləri çox ümidvericidir. Gələn il sərhəd keçid imkanları əhəmiyyətli dərəcədə artırılacaq. Bu əlaqə tranzit müddətini qısaldacaq, nəqliyyat xərclərini azaldacaq və Avrasiya üzrə ticarət axınlarının səmərəliliyini artıracaq. Mərkəzi Asiya ölkələri üçün bu, qlobal bazarlara çıxış imkanları yaradacaq. Azərbaycan üçün bu, Xəzər regionunda əsas logistika mərkəzi rolunu gücləndirir, Türkiyə üçün isə Asiya və Avropa arasında vacib qapı rolunu möhkəmləndirir”.