Üçtərəfli formatda birgə təlimlərin keçirilməsi hərbi birləşmələrimiz arasında əməliyyat uzlaşmasının əldə olunmasına yardım edəcək.

APA-nın yerli bürosunun xəbərinə görə, bu barədə Azərbaycanın müdafiə naziri, general-polkovnik Zakir Həsənov Azərbaycan-Gürcüstan-Türkiyə müdafiə nazirlərinin üçtərəfli görüşündən sonra bildiirib.

Nazir qeyd edib ki, birgə təlimlər üçtərəfli əməkdaşlığın yeni mərhələyə keçməsinə zəmin yaradacaq və nəticədə regional təhlükəsizliyə öz töhfəsini verəcək: “COVID-19 pandemiyasının yaratdığı məhdudiyyətlərə baxmayaraq, cari ildə üç ölkənin hərbi qulluqçularının iştirakı ilə bir sıra tədbirlər planlaşdırılaraq keçirilib. Hesab edirəm ki, dövlətlərimiz arasında səmimi münasibətlər və müdafiə sahəsi üzrə üçtərəfli əməkdaşlığımız sülh naminə tərəfdaşlığın hər kəsə örnək ola biləcək bir nümunəsidir. Üçtərəfli birgə fəaliyyətlərimiz regionda sabitliyin qorunmasına yönəlmiş sülhməramlı mesaj kimi qiymətləndirilməlidir”.