"Bilirsiz, Dağlıq Qarabağ məsələsi nə qədər ki öz həllini tapmayıb, Müdafiə nazirindən başqa bəyanat gözləmək, düzgün olmaz". Bu sözləri hərbi ekspert Üzeyir Cəfərov deyib.
Onun sözlərinə görə, torpaqları işğal altında olan dövlətin Müdafiə naziri bu və buna bənzər açıqlamalar verməlidir. "Zakir Həsənovun iyunun 20-də Müdafiə Nazirliyində Azərbaycan Respublikası Silahlı Qüvvələrinin rəhbər heyəti ilə 2015-ci ilin qış tədris dövrünün yekunlarına həsr olunmuş Kollegiya iclasında səsləndirdiyi fikir məhz bunu ifadə edir ki, Azərbaycan bu vəziyyətlə barışmaq fikrində deyil, Azərbaycan nəyin bahasına olursa-olsun, öz ərazi bütövlüyünü bərpa etməlidir və bərpa edəcək. Bunu da edəcək yeganə qüvvə Azərbaycan Silahlı Qüvvələri, onun zabitləri, əsgərləridir. Onlar gecə-gündüz təlim mərkəzlərində, təlim yerlərində öz döyüş hazırlıqlarını artırırlar. Zakir Həsənovun bu bəyanatını mən şəxsən belə qəbul edir və belə başa düşürəm ki, nazir məhz bunu demək istəyirdi və elə bunu da dedi ki, düşmən bundan nəticə çıxarsın. Çünki düşmən bundan nəticə çıxarmasa, əlbəttə ki, Azərbaycan var-gücü ilə, istənilən yolla öz ərazi bütövlüyünü bərpa etməyə qərarlıdır və bunu yaxın zamanlarda gözləmək olar. Mən şəxsən bunu açıq görürəm ki, ölkənin siyasi və hərbi rəhbərliyi bu məsələnin bu qədər uzanmasının artıq, belə desək, hamını bezdirdiyi və ATƏT-in Minsk qrupunun sədrlərindən də nəyisə gözləməyin düzgün olmadığı qənaətindədir. Mənə elə gəlir, çox tezliklə biz ərazi bütövlüyümüzün bərpası istiqamətində konkret addımların atılmasının şahidi ola bilərik".
Xatırladaq ki, iyunun 20-də Müdafiə Nazirliyində Azərbaycan Respublikası Silahlı Qüvvələrinin rəhbər heyətilə 2015-ci ilin qış tədris dövrünün yekunlarına həsr olunmuş Kollegiya iclası keçirilib.
Müdafiə naziri görüşdə hər an döyüşə hazır vəziyyətdə olmaq lazım olduğunu bildrib.

Əli