Urmu şəhərinin keçmiş bələdiyyə başçısı Məhəmməd Həzrətpur aprelin 8-də sərbəst buraxılıb.

O, girov qarşılığında məhkəmənin son qərarının elan olunmasına qədər müvəqqəti azadlığa çıxıb.

Keçmiş bələdiyyə başçısının son məhkəmə iclasının vaxtı barədə açıqlama verilməyib. Məhkəmənin qəti qərarının tarixi barədə heç bir məlumat yoxdur.

Bir müddət öncə sosial mediada yayılan məlumatlara görə, Urmu şəhərinin keçmiş bələdiyyə başçısı, onun bir neçə müavini və bələdiyyə əməkdaşı Tehranın İnqilab və Ümumi Məhkəməsinin istintaq bölməsi tərəfindən odlu silahların alveri, saxlanılması, daşınmasında, habelə korrupsiya və dövlət əmlakını talamaqda günahlandırılıb.

Qeyd edək ki, Urmu şəhərinin keçmiş bələdiyyə başçısı Məhəmməd Həzrətpur yanvar ayının 11-də İranın təhlükəsizlik məmurları tərəfindən saxlanılıb.

O, bir gün sonra ETTELAAT məmurları tərəfindən “ətraflı izahat” almaq üçün Tehrana aparılıb və orada dindirilib.

Məhəmməd Həzrətpur Qərbi Azərbaycan, özəlliklə Urmuda yaşayan mühacir qeyri-türk sakinlərin hədəfində olub, dəfələrlə “Türkiyə Cumhuriyyətinə, Azərbaycan Respublikasına casusluqda və pantürkizmdə" günahlandırılıb.

Gunaz.tv