Rusiya prezidenti Vladimir Putin Türkmənistanın rəhbəri Serdar Berdiməhəmmədovu Qələbənin 78-ci ildönümünə həsr olunmuş Moskvada keçirilməsi planlaşdırılan şənliklərdə iştirak etməyə dəvət edib.

"Xalq Cəbhəsi" xəbər verir ki, bu barədə ölkə liderləri arasında telefon danışığından sonra rəsmi “Neytral Türkmənistan” qəzeti məlumat yayıb.

Putin və Berdiməhəmmədov yaxınlaşan Qələbə Günü münasibətilə bir-birini təbrik edib, həmçinin hər iki ölkənin xalqlarına rifah və firavanlıq arzulayıblar. Qəzetin yazdığına görə, Türkmənistan rəhbəri Putinə dəvətə görə təşəkkür edib. Onun qəbul edib-etməyəcəyini “Neytral Türkmənistan” dəqiqləşdirməyib. Berdiməhəmmədov Böyük Vətən Müharibəsi və faşizm üzərində qələbənin ümumi tarixi yaddaşda xüsusi yer tutduğunu vurğulayıb. Bildirilib ki, Rusiyada olduğu kimi, Türkmənistanda da o ağır illərdə vətəni müdafiə edən, arxa cəbhədə fədakarlıqla çalışanların xatirəsi müqəddəs şəkildə ehtiramla yad edilir.

Cavid