“İslam Əməkdaşlıq çərçivəsində Suriya hər zaman Azərbaycanın maraqlarına qarşı çıxış edib. Həmçinin Ermənistanın baş naziri Nikol Paşinyan Bəşər Əsədlə çox sıx təmasda olub. N.Paşinyan Suriyada keçirilmiş saxta seçkilərin nəticəsi olaraq yenidən prezident seçilmiş B.Əsədə xüsusi təbriklərini göndərib, Ermənistanla Suriya arasında münasibətlərin çiçəklənməsi ilə bağlı ona arzularını ifadə edib, bu prosesdə Ermənistanın hər zaman B.Əsədin yanında olduğunu göstərib”.

Bu sözləri xalqcəbhəsi.az-a açıqlamasında Milli Məclisin deputatı Azər Allahverənov söyləyib.

O, Suriyada Əsəd rejiminin çökməsinin Ermənistanın maraqlarına çox ciddi zərbə vurduğunu bildirərək əlavə edib ki, Suriyada ermənilərin sayı müxtəlif mənbələrdə fərqli saylar səsləndirilirdi: “Amma aydın məsələ idi ki, Hələb və digər şəhərlərdə bəlli erməni icması yaşayırdı və onlar çox zəngin zümrənin nümayəndələri hesab olunurdu. Birinci Qarabağ müharibəsində, sonra Azərbaycan ərazisinin beşdə bir hissəsinin işğal olunduğu dönəmlərdə Suriya və Ermənistan arasında əldə olunmuş razılığa görə hətta 90 minə qədər erməniəsilli suriyalının Ermənistana köçməsi təşkil olunmuşdu və oradan da işğal altında olan Azərbaycan torpaqlarında yerləşdirilməsi baş verirdi. Yəni bütün beynəlxalq hüquq və normalara, konvensiyalara zidd olan siyasət həyata keçirilirdi ki, bunu Ermənistan həm də Suriyanın əli ilə edirdi. Təbii ki, bu, bir İslam ölkəsi olaraq Suriya üçün yolverilməz bir hal idi. Suriya hər zaman sözdə İslam həmrəyliyini dilə gətirsə də amma görürdük ki, Azərbaycana, Türkiyəyə, Pakistana qarşı gedən səlib yürüşündə çox fəal iştirak edirdi. Bu, Suriyanın ermənipərəst mövqedə olmasının bariz nümunəsi idi”.

Röya İsrafilova