ABŞ-ın Montana ştatında meşəlik ərazidə qəzaya uğrayan kiçik təyyarənin yeri qurbanlardan birinin taxdığı ağıllı saat sayəsində tapılıb. Qəza nəticəsində 3 nəfər həlak olub.
Xalqcebhesi.az xəbər verir ki, Gallatin qraflığının şerif ofisinin məlumatına görə, Montana ştatında sıx meşəlik ərazidə qəzaya uğrayan təyyarənin qalıqları qurbanlardan birinin taxdığı ağıllı saat sayəsində tapılıb. Qəza nəticəsində təyyarədə olan hər üç nəfər həlak olub.
Qurbanların 60 yaşlı Rodni Konover və Tennessi ştatından olan 23 yaşlı Madison Konover və Yuta ştatından 55 yaşlı Kurt Enok Robi olduğu müəyyən edilib.
Təyyarənin cümə axşamı gecə yarısından əvvəl West Yellowstone hava limanından havaya qalxdığı bildirilir. Lakin az sonra ABŞ Nəqliyyat Departamentinin Aviasiya İdarəsi təyyarənin yerini itirdiyini bildirib və yerli hakimiyyət orqanlarından kömək istəyib.

Ağıllı saat siqnalı istiqamət verdi

Axtarış-xilasetmə qrupları cümə günü günortadan sonra bir sərnişinin ağıllı saatından əldə edilən yer məlumatından istifadə edərək, dağıntıları Qərbi Yelloustounun cənubundakı ucqar ərazidə tapıblar. İki ayrı kəşfiyyat təyyarəsi qəzanın yerini müəyyənləşdirdi, lakin ekipajların qurudan sıx meşəlik əraziyə çatması saatlarla çəkdi. Şerifin ofisindən verilən açıqlamada, "Axtarış və xilasetmə qrupları təyyarənin yerini müəyyənləşdirib və hər üç sərnişinin öldüyünü təsdiqləyib". Cəsədlər təyyarədən çıxarıldıqdan sonra helikopterlə ərazidən çıxarılaraq şərifin müavini tərəfindən tibbi ekspertizaya təhvil verilib.

Məryəm Quliyeva