Hindistan Hörmüz boğazında iki ticarət gəmisinə edilən və nəticədə bir hindistanlı dənizçinin həlak olması, daha 10 vətəndaşının isə yaralanması ilə nəticələnən hücumlarla bağlı İrana etirazını bildirib.

Xalqcebhesi.az xəbər verir ki, bu barədə Hindistan Xarici İşlər Nazirliyinin (XİN) bəyanatında deyilir.

Cənubi Asiya respublikasının xarici siyasət idarəsi təsdiqləyib ki, çərşənbə axşamı İranın Yeni Dehlidəki diplomatik missiyasının rəhbər müavini Hindistan XİN-ə çağırılıb. XİN qeyd edib: "Hindistan Hörmüz boğazından keçən "MT Al Bahiyah" və "MT Mombasa" gəmilərinə edilən hücumlardan dərindən narahatdır. Gəmilərin göyərtəsində 46 heyət üzvü, o cümlədən 30 hindistanlı dənizçi olub. "MT Al Bahiyah" gəmisindəki 12 Hindistan vətəndaşından biri həlak olub, daha biri isə yaralanıb". İdarənin məlumatına görə, "MT Mombasa" gəmisindəki 18 hindistanlıdan doqquzu xəsarət alıb, onlardan ikisinin vəziyyəti ağırdır.

"Hörmüz boğazı kimi beynəlxalq su yollarında azad və təhlükəsiz gəmiçiliyi pozan bu hücumları qətiyyətlə pisləyirik", — deyə Hindistan nazirliyindən vurğulanıb. Respublikanın XİN həmçinin "Yaxın Şərqdə hücumların yenidən başlaması və hərbi əməliyyatların eskalasiyası ilə bağlı dərin narahatlığını" ifadə edib və regionda sülh, təhlükəsizlik və sabitlik naminə dialoq və diplomatiyaya qayıtmağa çağırıb.