Putin: "Ukraynada legitim hakimiyyət yoxdur"
Ukrayna XİN: Krımın Rusiyaya birləşdirilməsinin demokratiya və sağlam məntiqlə əlaqəsi yoxdur

Moskvada Krım və Sevastopolun Rusiya Federasiyasına birləşdirilməsinə dair saziş imzalanıb. Sənədə Rusiya prezidenti Vladimir Putin, Krımın Ali Şurasının sədri Vladimir Konstantinov, Krımın baş naziri Sergey Aksyonov və Sevastopol şəhərinin meri Aleksey Çalıy imza atıblar.
Qeyd edək ki, sazişin imzalanması mərasimi Kremldə Putinin Rusiya Federasiya Şurasına müraciətindən sonra baş tutub.
Müvafiq sənəd Rusiya Federasiyası tərkibində iki yeni subyektin yaradılmasını nəzərdə tutur.
Vladimir Putin mətbuat üçün keçirilən brifinqdə bəyan edib ki, Ukraynanın müstəqilliyi dövründə prezidentlər, baş nazirlər, deputatlar dəyişib, lakin onların vətəndaşlara münasibəti dəyişməyib. O qeyd edib ki, bu insanlar hakimiyyət uğrunda mübarizə aparıb.
Korrupsiyaya qarşı etiraz edən Maydan fəallarını yaxşı anladığını deyən Putin Ukraynadakı son hadisələrin arxasında duranların başqa məqsədlər güddüyünü bildirib. Onun sözlərinə görə, bu addımların arxasında faşistlər və rusofoblar dayanıb.
Putin qeyd edib ki, Ukraynada legitim hakimiyyət mövcud deyil. "Danışıqlar aparmaq üçün adam da yoxdur. Hətta nazirin qəbuluna düşmək üçün Maydan silahlılarının icazəsi lazımdır. Bu, bu günün reallığıdır".
Putin Ukrayna xalqına zərər vermək istəmədiyini də vurğulayıb: "Sizi Rusiya ilə qorxudanlara inanmayın. İnanmayın ki, Krımın ardınca digər bölgələr gedəcək, bu, bizə lazım deyil. Krım isə strateji bölgədir. Bu bölgə güclü və davamlı suverenliyin nəzarətində olmalıdır, bu rolda yalnız Rusiya çıxış edə bilər".
Rusiya prezidenti həmçinin bildirib ki, Ukrayna ilə bağlı məsələdə Qərb qüvvələri kobud və qeyri-peşəkar mövqe sərgiləyib.
Ukraynanın NATO-ya mümkün qəbuluna gəldikdə isə Putin bunu Rusiyanın cənubu üçün təhlükə kimi dəyərləndirib: "Biz istəmirik ki, qonşuluğumuzda NATO qüvvələri olsun".
Ukrayna Xarici İşlər Nazirliyindən isə mətbuata bildiriblər ki, Krımın Rusiyaya birləşdirilməsinə dair sazişin imzalanmasının demokratiya və sağlam məntiqlə əlaqəsi yoxdur. Ukrayna XİH-in təmsilçisi Perebıynis Ukraynanın Krımın müstəqilliyini və onun Rusiyaya birləşdirilməsini heç vaxt tanımayacağını bəyan edib: "Ukrayna "status-kvo"nun bərpası üçün bütün beynəlxalq tədbirlərə əl atacaq".