ABŞ-da yarış avtomobillərinin ən yaxşı qadın sürücüsü və teleaparıcı Cessi Kombs avqustun 27-də həlak olub. O, reaktiv avtomobildə yeni dünya rekordu müəyyən etməyə çalışarkən ölümcül xəsarət alıb.
39 yaşlı Cessi Kombs Oreqon ştatının Alvorda səhrasında həlak olub. O, reaktiv avtomobildə qurumuş gölün dibi ilə saatda 996 kilometr sürət götürməyə çalışıb.
Pilot öz rekordunu bir daha təzələmək istəyib. 2013-cü ildə C.Kobs saatda 632 kilometr sürətlə gedərək tam 48 il yenilənməyən bir rekordu təzələyib, üç il sonra reaktiv avtomobildə saatda 769 kilometr sürət götürərək yeni rekord müəyyən edib.
C.Kombs müxtəlif vaxtlarda ABŞ-da “Sərt tyuninq”, “Ekstrim 4x4” və “Əfsanələri puça çıxaranlar” kimi populyar televiziya verilişlərinin həmaparıcısı olub.
İki həftədən bir qədər az əvvəl Yeni Orleanda (Luiziana ştatı) ikiyerlik, yüngülmotorlu təyyarə qəzaya uğrayıb. Onu ABŞ-da çox tanınan kaskadyor Frank Auqustus idarə edib. Auqustusun yeganə sərnişini 23 il “Fox8” kanalında çalışmış jurnalist və teleaparıcı Nensi Parker olub. Qəza baş verəndə o, televiziya üçün yüksək pilotaj fiqurları və kaskadyorların işi barədə süjet çəkirmiş. Onların hər ikisi qəzada həlak olub.