Ermənistan silahlı qüvvələrinin Tovuz rayonunun Qaralar kəndini atəşə tutması nəticəsində 13 yaşlı Ramin Yusifovun yaralanması faktı Ermənistanın iç üzünü bir daha ortaya qoyur.
Milli Məclisin vitse-spikeri Bahar Muradova belə deyib.
Onun sözlərinə görə, Ermənistanın bu vandal siyasətinin mahiyyəti insanlığa və bəşəriyyətə qarşı cinayətlər toplusundan ibarətdir:
"Biz nə qədər beynəlxalq ictimaiyyəti bu məsələyə diqqətli yanaşmağa, nəinki belə hadisələri təkcə pisləməyə, bu kimi nəticələrə gətirib çıxaran siyasətlərə qarşı çıxmağa, Ermənistanın təcavüzkar siyasətini durdurmağa çağırsaq da, çox təəssüf ki, dünya ictimaiyyəti bu məsələdə seyrçi mövqedə qalmaqda davam edir. Hətta hansısa səslər qalxırsa belə, beynəlxalq ictimaiyyətin ümumi mövqeyinə çevrilə bilmir. Təəssüf ki, təkcə bizim regionda deyil, bütün dünyada bu gün uşaqlara, qadınlara, qocalara, bütövlükdə insanlığa qarşı cinayətlər getdikcə genişlənməkdə və çoxalmaqdadır. Cinayətkarlar cəzasız qaldığı üçün indiyədək başda Ermənistan olmaqla, bu kimi siyasətləri aparan ölkələr bunu bir növ adi hal kimi qəbul edərək hədəflərinə çatmaq üçün istfadə etməkdədirlər. Bəlkə də bu, vasitədən daha çox artıq onların məqsədinə çevrilib. Çünki məqsəd Azərbaycanın Dağlıq Qarabağ və ona bitişik rayonlarını, bütövlükdə Ermənistanın iştahası və iddia obyekti olan əraziləri sakinlərdən təmizləmək, onları yaşadığı yerdən didərgin salmaq və bir növ hər zaman təhlükə altında olduqlarını anlatmaqdan ibarətdir ki, öz təcavüzkar siyasətlərini daha rahat aparsınlar. Məqsədləri yalnız heç də hazırda işğal altındakı ərazilərdə möhkəmlənməkdən ibarət deyil, onlar qarşılarına bundan da irəli gedən "hədəflər" qoyublar".
Bahar Muradovanın fikrincə, bu yaxınlarda azyaşlı Zəhra və nənəsinin qətlə yetirilməsini olmayan "vicdanlarına" sığışdırmaları bu siyasəti aparanların mahiyyətindən, iç üzündən xəbər verir və göstərir ki, Ermənistanın yeritdiyi siyasət nəinki insanlığa, həm də öz xalqına qarşıdır: "Başqa xalqlara bədbəxtlik gətirən siyasətin öz xalqına xoşbəxtlik gətirməsi mümkün deyil. Ermənistanın hazırki durumu, ictimaiyyətdə getdikcə qalxmaqda olan səslər göstərir ki, nəinki analar, atalar da özgə torpağında öz övladlarını itirmək istəmir və bu siyasət heç kimə fayda gətirmir. İndiki zaman çərçivəsinə sığışdırsaq, bu, Ermənistanda hazırda hakimiyyətdə olan insanların öz vətəndaşlarını müharibə təhlükəsi altında saxlamaqla öz iqtidarlarının ömrünü uzatmağa yönəldiyini bir daha ortaya qoyur".
Vitse-spiker hesab edir ki, uşaq qatilləri, dinc insanlara qarşı silah tutan, atəş açan və onların öldürülməsini öz qəhrəmanlığı və xalqına xidmət sayanları tarix çox pis şəkildə cəzalandıracaq: "Bu cəzanın tam şəkildə verilməsi üçün biz də Azərbaycan olaraq bütün imkanlarımızı səfərbər edərək həm siyasi, həm də digər yollarla Ermənistana öz yerini göstərməli və Azərbaycan vətəndaşlarının təhlükəsizliyini təmin edərək ölkəmizin ərazi bütövlüyünü bərpa etməliyik. Bu, bizim qarşımızda duran vəzifədir. Bizim vəzifəmiz müqəddəs olduğu halda, Ermənistanın qarşısında duran "hədəflər" bütün insanlığa qarşı yönəlib. Adicə bu müqayisə kimin kim olduğunu söyləməyə imkan verir".