“Ermənistan müharibəyə hazır deyil” Siyasət

“Ermənistan müharibəyə hazır deyil”

Azərbaycan ordusunun martın 12-də başladığı genişmiqyaslı hərbi təlimlər Ermənistanda ciddi narahatlığa səbəb olub. 25 min hərbçinin, zirehli texnika, artilleriya sistemi və aviasiyanın iştirak etdiyi təlimlər erməni ekspertləri tərəfindən də maraqla izlənilir.
"Azərbaycan hərbi təlimlərə əsas arsenalını – T-90, T-72 tanklarını, "Smerç" reaktiv yaylım atəşi sistemlərini və s. cəlb edib. Narahatedici məqam bu texnikanın növləri deyil, onların sayı ilə bağlıdır"-deyə "Yeni Müdafiə Sifarişi : Strategiyalar" jurnalının şef-redaktoru Leonid Nersisyan deyib.
Ekspertin fikrincə, hərbi təlimlər yeni müharibənin başlanmasına səbəb olmasa da, Azərbaycan ordusunun döyüş qabiliyyətinin artmasına gətirib çıxaracaq.
"Müntəzəm və geniş miqyaslı təlimlər Azərbaycan ordusunun döyüş qabiliyyətini artıracaq. Münaqişə həll olunmadıqca, hərbi əməliyyatların yenidən başlanması riski qalacaq. Ona görə Ermənistan bu çox arzuolunmaz müharibə riskinə hazır olmalıdır. Amma təəssüf ki, müharibəyə hazır deyilik".
Hərbi analitik Samvel Ağababyan isə Azərbaycanın bu il keçirdiyi hərbi təlimlərdə geniş hərbi arsenaldan istifadə etdiyini deyib.
"Azərbaycan Müdafiə Nazirliyi son illər ərzində ilk dəfə olaraq təlimlərdə düşmən hücumunun qarşısının alınması və müdafiə xəttinin bərpa olunması ilə bağlı təlimlər keçirib. Təlimlərdə Mi-24 döyüş helikopterləri, Su-25 və MiQ-29 qırıcıları, "Smerç" reaktiv yaylım atəşi sistemləri, "Sand Cat" zirehli avtomobilləri və s. iştirak edir".
Daha bir hərbi ekspert Taron Ovanisyan isə Azərbaycan ordusunun istifadə etdiyi İsrail silahlarına diqqət çəkib.
"İsrail istehsalı olan "Lynx" artilleriya sistenləri, Mi-35 və Mi-8/17 helikopterləri, həmçinin, müasir radioelektron mübarizə vasitələrindən istifadə Azərbaycan ordusunun döyüş qabiliyyətinin yüksək olmasından xəbər verir".