“Amerikanın səsi” radiostansiyası Ermənistanın BMT Baş Assambleyasında müzakirələr zamanı iştirakını tədqiq edib.
Ermənistan 114 qətnamənin səsverməsində iştirak edib. Bu zaman onun iştirakı daha çox Azərbaycan, Türkiyə və Rusiyanın mövqeyi ilə üst-üstə düşüb, ABŞ-ın mövqeyinə uyğun olmayıb:
114 qətnamədən 76-sına Ermənistan və Azərbaycan eyni, cəmi 2-sinə fərqli səs veriblər. Ermənistan və Gürcüstan 75 qətnaməyə eyni, 10-una fərqli səs veriblər. Ermənistan və Türkiyə 114 qətnamədən 69-na eyni, cəmi 9-na isə fərqli cavab veriblər.
Ermənistanın səsverməsi 77 dəfə Rusiyanın mövqeyi ilə üst-üstə düşüb, 5 dəfə bir-birinə zidd olub. Ermənistanın mövqeyi ABŞ-ın mövqeyi ilə cəmi 17 dəfə üst-üstə düşüb.
Ermənistanın ABŞ, Rusiya, Gürcüstan istiqamətində səsvermələrdə iştirakı bizim indiki yazımızın müzakirə mövzusu deyil. Müzakirə mövzusu odur ki, regional siyasi arxitektura Ermənistanı əsas parametrlərini Azərbaycan və Türkiyənin müəyyənləşdirdiyi paradiqmaya yönəldir. Bu, regional siyasi proseslərin Ermənistana kifayət qədər mühüm strateji mesajıdır. Ermənilər təhtəlşüurda bu addımları atır, amma düzgün nəticə çıxara bilmir. Həm də Ermənistanın rəhbərliyi erməni xalqının genetik yaddaşını da inkar edir.
Beləliklə yaranmış vəziyyətdə Ermənistanın öz təhtəlşüurunu və öz xalqının genetik yaddaşını anlaması zərurətə çevrilir. Genetik yaddaşda əsas aparıcı parametr Azərbaycan və Türkiyə fakorudur. Əlbəttə, kimsə deyə bilər ki, Ermənistanın ABŞ-ın əleyhinə səs verdiyi qətnamələrdən biri İsrail səfirliyinin Qüdsə köçürülməsi ilə bağlı idi və burada Ermənistanın tutduğu mövqe daha çox İranla əlaqəli ola bilər. Bu amil özü də regional paradiqmada Azərbaycan və Türkiyənin mövqeyinin daha da təsirli olduğunu göstərir. Çünki ABŞ-ın Qüdslə bağlı qətnaməsində Türkiyə, Azərbaycan və İran eyni mövqedən çıxış etmişdi.
Regionda ciddi proseslər gedir. N.Paşinyanın özü radikal islamçıların regiona daxil ola biləcəyini etiraf edir. Ermənilər bir neçə dəfə bu parametrdən Azərbaycanın əleyhinə istifadə etməyə çalışıblar. Elə proseslər var ki, Ermənistan onlardan yan keçə bilməyəcək. Ermənistan dövlətçiliyinin bu proseslərdən salamat çıxması üçün o, Türkiyə və Azərbaycanın paradiqmasında özünü rahat hiss etməlidir. Bunun üçün o həm Türkiyə, həm də Azərbaycanla münasibətləri normallaşdırmalıdır. Türkiyə və Azərbaycanla münasibətləri normallaşdırmağın yeganə yolu Dağlıq Qarabağ münaqişəsinin həllindən keçir.

Mübariz Əhmədoğlu