Çexiya parlamentinin müşahidə missiyası fevralın 10-da Milli Məclisə seçkilərlə əlaqədar mətbuat konfransı keçirib.
Çexiya Deputatlar Palatasının üzvü Yaroslav Holik seçkiləri 16 məntəqədə müşahidə etdiklərini bildirib. O, məntəqələrdə yaradılan şəraitdən məmnun qaldıqlarını, müşahidələri zamanı qayda pozuntusu qeydə almadıqlarını vurğulayıb.
“Azərbaycanda seçkilər zamanı öz ölkəmizdə tətbiq olunmayan yeniliklərin də şahidi olduq. Azərbaycanda görmə qabiliyyəti olmayan seçicilər üçün bülletenlər Brayl əlifbası ilə hazırlanıb. Bu, onların digər vətəndaşlar kimi səsvermə hüquqlarından yararlanmasına imkan verir. Bununla yanaşı, seçicilərin barmaqlarının rəngsiz mürəkkəblə rənglənməsi onların təkrar səs vermələrinin qarşısının alınmasında, şəffaflığın təmin olunmasında mühüm rol oynayır. Seçki məntəqələrində veb-kameraların quraşdırılması da təqdirəlayiqdir. Bizim müşahidələrimiz çox yaxşı keçdi, heç bir qayda pozuntusuna rast gəlmədik”, - deyə Y.Holik qeyd edib.
Missiyanın digər üzvü Kveta Matuşovska da müşahidələrinin nəticələrindən məmnun qaldığını, onlar üçün məntəqələrdə hər cür şəraitin yaradıldığını diqqətə çatdırıb.