Qabil Hüseynli: "Bu kreditlə Ermənistan özünün müasir silahlara olan tələbatını ödəməlidir"
"Rusiya Ermənistana aşağı faizlə kredit ayırır, bəlkə də bu kredit deyil, sadəcə olaraq bağışlanmanın bir formasıdır. Bu fikri Ermənistanın Rusiyadan hərbi sahəyə xərcləmək üçün 200 milyon dollar kredit almasına münasibətində politoloq Qabil Hüseynli deyib.
O qeyd edib ki, bu kreditlə Ermənistan özünün müasir silahlara olan tələbatını ödəməlidir: "Artıq Ermənistana zirehli texnika növləri verilməyə başlayıb. Ermənistan "İskəndər-M" raket sistemi də almaq niyyətindədir. Bu çox təhlükəli silahdır və Ermənistan ordusunu xeyli gücləndirə bilər".
Politoloq qeyd edib ki, Rusiya Ermənistanı yenidən silahlandırmağa başlayır: "Rusiya guya Azərbaycanla Ermənistan arasındakı silah balansını qorumaq üçün bunu edir. Əslində silah balansını Ermənistanın xeyrinə dəyişmək istəyir".
Q.Hüseynli sonda vurğulayıb ki, bu çox təhlükəli məsələdir və yəqin ki, Azərbaycan bununla bağlı tədbirlər görəcək.