​Masallı rayonunun Viləş kəndində Azərbaycanın ərazi bütövlüyü uğrunda canlarından keçmiş iki igid qardaşın – Aprel döyüşləri şəhidi Nurlan Əsgərli və qardaşının qisasını alaraq Şuşada şəhadətə ucalan İntiqam Əsgərlinin xatirəsinə ucaldılan “Şəhid Qardaşları” Ev Muzeyinin təntənəli açılış mərasimi keçirilib.
​
​Tədbirdən öncə rəsmi qonaqlar və ictimaiyyət nümayəndələri qəhrəman qardaşların məzarını ziyarət edərək, ruhlarına dualar oxuyub, məzarları önünə tər çiçəklər düzüblər.
​
​Muzeyin açılış mərasimində Masallı Rayon İcra Hakimiyyətinin başçısı Araz Əhmədov,
​Milli Məclisin deputatı Məşhur Məmmədov,
​ “Şəhid ailələri və veteranları” İctimai Birliyinin sədri Bəhruz Məmmədzadə,
​ “İnkişafa və islahatlara dəstək” İctimai Birliyinin sədri Ramil Əliyev, ​Xüsusi Təyinatlı Qüvvələrin qaziləri, şəhid ailələri və rayon ictimaiyyəti iştirak edib.
​
​Açılışda çıxış edənlər vurğulayıblar ki, bu muzey sadəcə xatirə məkanı deyil, həm də gənc nəsil üçün bir vətənpərvərlik məktəbidir. Burada sərgilənən şəxsi əşyalar, fotolar və döyüş yolu haqqında məlumatlar hər bir azərbaycanlıya fədakarlığın ən uca zirvəsini nümayiş etdirir.
​”Aprel döyüşlərindən başlayan zəfər yolu 44 günlük Vətən müharibəsində Şuşanın azad edilməsi ilə zirvəyə çatdı. Nurlan və İntiqam qardaşlarının keçdiyi yol bu şərəfli salnamənin ayrılmaz hissəsidir.”
​
​Tədbirdə qeyd olunub ki, şəhidlərimizin xatirəsini yaşatmaq hər bir vətəndaşın borcudur. İntiqam Əsgərlinin qardaşının qisasını döyüş meydanında alaraq Şuşada şəhid olması Azərbaycan əsgərinin sarsılmaz iradəsinin və qardaşlıq bağının rəmzi kimi tarixə düşüb.