Azay Quliyev Xocalı soyqırımı ilə bağlı qətnamə qəbul etməyə çağırıb

Dünən gün Azərbaycan prezidenti yanında QHT-lərə Dövlət Dəstəyi Şurasının dəstəyi ilə ərəb dilində nəşr edilmiş "Əl-Ədalət Li Xocalı" (Xocalıya Ədalət) kitabının təqdimatı keçirilib.
APA-nın verdiyi məlumata görə, kitabın müəllifi Əli Rzazadədir. Tədbirdə Liviya, Səudiyyə Ərəbistanı, Qətər, Mərakeş və Fələstinin Azərbaycandakı səfirliklərinin nümayəndələri və QHT təmsilçiləri iştirak ediblər.
Şura sədri Azay Quliyev deyib ki, kitab Şuranın elan etdiyi müsabiqə çərçivəsində "QHT Nəşriyyatı"nda çap olunub: "Məqsəd ərəb ölkələrində ictimaiyyətin Xocalı soyqırımı barədə məlumatlandırılmasıdır. Digər tərəfdən, Xocalıda baş verənlər qətliam, faciə, soyqırım adlandırılır. Bu soyqırımdır və mən səfirliklərin nümayəndələrindən də xahiş edərdim ki, bu barədə danışanda "soyqırım" ifadəsindən istifadə etsinlər. İslam Əməkdaşlıq Təşkilatı Parlament Assambleyası da Xocalı soyqırımını tanıyan qətnamə qəbul edib. Ayrı-ayrı ölkələrin parlamentlərinin də Xocalı soyqırımı ilə bağlı qətnamə qəbul etməsini istəyir və umuruq. Ərəbdilli ölkələrin səfirliklərinin nümayəndələrindən də Azərbaycan vətəndaş cəmiyyətinin bu xahişini ölkələrinə çatdırmalarını istəyirik".
A.Quliyev ərəbdilli ölkələrdə Xocalı soyqırımının tanınması üçün Şuranın lazımı materialların təqdim edilməsinə hazır olduğunu da açıqlayıb.
Ə.Rzazadə müəllifi olduğu kitab və Xocalı soyqırımı barədə danışıb.Tədbirdə Fələstinin Azərbaycandakı səfirliyi adından Xocalı soyqırımı qurbanlarının yaxınlarına və Azərbaycan xalqına başsağlığı verilib, Azərbaycan xalqına ərazi bütövlüyünü bərpa etmək arzu edilib.
Tədbir QHT təmsilçilərinin çıxışları ilə davam edib.