“Co Bayden bu günlərdə özünün prezidentlik səlahiyyətlərindən sui-istifadə edərək öz oğlunu əfv edib. Bu, ABŞ demokratiyasına, qanunun aliliyi prinsipinə növbəti bir zərbədir. Qeyd etmək lazımdır ki, təxminən 50 ildir siyasətdə olan Co Bayden bütün siyasi karyerası boyu dəfələrlə bəyanatlarında qeyd etmişdi ki, mən heç zaman ədliyyə orqanlarına müdaxilə etməyəcəm, hətta prezidentlik dövründə də bəyan etmişdi ki, öz oğlunu amnistiya etməyəcək, oğlu ilə bağlı məhkəmə prosesinə müdaxilə etməyəcək. Ancaq bununla belə o, öz vədinin üstündən xətt çəkərək belə bir addım atdı. Eyni zamanda, bu, sözsüz ki, ABŞ cəmiyyətini növbəti dəfə sarsıdan bir bəyanat oldu. Çıxışında Bayden bildirdi ki, ümid edirəm Amerika əhli məni bir ata kimi anlayar. Lakin reallıq bundan ibarətdir ki, prezidentin bu cür addım atmasına ABŞ cəmiyyətində də birmənalı yanaşılmır”.

Bu sözləri xalqcəbhəsi.az-a açıqlamasında politoloq Sultan Zahidov deyib.

O bildirib ki, hər şeydən əvvəl əsrlər boyu qanunun aliliyi prinsipini təbliğ edən, hətta digər dövlətlərə yeritməyə çalışan bir dövlətin prezidentinin öz səlahiyyətlərindən sui-istifadə edərək oğlunu amnistiya etməsi istər-istəməz həmin prinsipin zədələnməsi deməkdir: “Bu da ABŞ-də növbəti dəfə demokratiya böhranının yaşanmasının işartılarıdır. Yeni prezident seçilən Donald Tramp bu addımı qeyri-qanuni və hüquqa zidd adlandırdı. Yalnız D.Tramp deyil, digər rəsmilər də bununla bağlı çıxış etdilər və həmin addımı ABŞ dövlətinin hüquqi, fundamental prinsiplərinə zidd bir addım kimi qələmə verdilər. Bu,bir daha onu göstərir ki, ABŞ rəhbərliyi ilk növbədə öz daxilindəki problemlərə fokuslanmalıdır. Çünki ABŞ demokratiyası son zamanlar ciddi böhran keçirməkdədir. Həm qaradərililərə qarşı olan ayrıseçkilik davam edir, həm dövlətin siyasi instansiyalarının məhkəmə instansiyalarına müdaxiləsi davam edir. Eyni zamanda, ABŞ Konqresində qeyri-qanuni proseslər baş verməkdədir. Yəni ABŞ Konqresinin qaranlıq tərəfi son zamanlar ifşa olunmaqdadır. Bütün bunlar hamısı ABŞ demokratiyasının böhranla üzləşdiyinin bir rəsmidir”.

Röya İsrafilova