“Suriya və Ermənistan üçün Türkiyə, türk xalqı amili var. Həmçinin üçüncü bir dövlət, həm Ermənistanın, həm Suriyanın yaranmasında birbaşa iştirak etmiş Fransa hökuməti var. Bilavasitə istər Suriya ərazisində osmanlılara qarşı müharibənin aparılması, istərsə də Cənubi Qafqaz bölgəsində Ermənilərə dəstək göstərmək bütün bunlar onu göstərir ki, onlarda tarixən türklərə qarşı bir nifrət hissi olub”.

Bu sözləri xalqcəbhəsi.az-a açıqlamasında Milli Məclisin deputatı Azər Allahverənov söyləyib.

Deputat əlavə edib ki, hər zaman türklərə qarşı müharibəni bu və ya digər formada Ermənistan və Suriya üzərindən aparmaqda maraqlı olan qüvvələr var: “Müəyyən mənada da buna nail olublar. Ermənistan və Suriya arasında çox sıx bağlar var. Suriya qondarma erməni soyqırımını parlament səviyyəsində tanıyan dövlət olub. Digər tərəfdən Ermənistan ilə Suriya arasında münasibətlərin müxtəlif dövrlərinə nəzər salanda aydın olur ki, Birinci Qarabağ müharibəsində Suriyadan gəlib Dağlıq Qarabağda vuruşan çoxsaylı muzdlular olub. Eləcə də Nubar Ozanyan da Birinci Qarabağ müharibəsində fəal iştirak edən şəxslərdən idi. Sonrakı mərhələdə o, döyüşlərdə həlak olandan sonra onun adına ayrıca bir batalyon yaradılır, həmin batalyon da Suriyada Bəşər Əsədə birbaşa olaraq dəstək verməklə burada türkəsilli tayfalardan ibarət olan dəstələrə qarşı amansız müharibələr aparıb”.

A.Allahverənov həmçinin diqqətə çatdırıb ki, Suriyada erməniəsillilərdən ibarət terror dəstlərinin fəaliyyət göstərməsi, sonrakı mərhələdə Birinci Qarabağ müharibəsində iştirak etməsi, Ermənistana silah dəstəyinin verilməsi, eyni ilə də Ermənistanın Suriyaya hərbi yardım göstərməsi bütün bunlar artıq ondan xəbər verir ki, B.Əsəd rejiminin ermənipərəst mövqe tutmasının konkret səbəbləri var: “Onların bu münasibəti çox xoş bir münasibətdir. “Düşmənimin düşməni mənim dostumdur” prinsipini biz B.Əsədin xarici siyasətində də görürük. Necə ki, Ermənistan-Türkiyə münasibətləri hansı müstəvidədirsə, eyni düşmən münasibətini də B.Əsəd rejimi həm də Türkiyəyə bəsləyib”.

Röya İsrafilova