Pentaqonun məlumatlarına görə, ABŞ Ordusu "Lockheed Martin" şirkəti ilə yüzlərlə "PrSM" (Precision Strike Missile) yerüstü operativ-taktiki raketlərinin sürətləndirilmiş istehsalına dair müqaviləyə əlavə saziş imzalayıb.

Xalqcebhesi.az xəbər verir ki, bu barədə "İnterfaks" məlumat verir.

Əlavə edilmiş $8,4 milyard nəzərə alınmaqla, 2032-ci ilin sentyabrınadək icra edilməli olan müqavilənin ümumi məbləği indi $13,3 milyard təşkil edir. ABŞ Ordusunun hər il bu tipli 400-ədədədək raket alması planlaşdırılır.

Strateji və Beynəlxalq Araşdırmalar Mərkəzinin (CSIS) qiymətləndirməsinə görə, ABŞ İrana qarşı hərbi əməliyyat zamanı bu silahın demək olar ki, bütün arsenalını sərf edib.

"PrSM" — hədəflərə hücum etmək, onları sıradan çıxarmaq və məhv etmək üçün kritik imkanlar təmin edən yeni nəsil uzaqmənzilli, yüksək dəqiqlikli zərbə raketidir. Onun fəaliyyət radiusu 499 km-dir. Gələcəkdə bu məsafənin 1000 km-ə qədər artırılması planlaşdırılır. "PrSM" ABŞ ordusunun silahlanmasında olan 300 km mənzilli "ATACMS" raketini əvəz edib.

"PrSM" raketləri mövcud olan universal mobil buraxılış qurğularına — tırtıllı bazaya malik "M270" və təkərli şassidə olan "HIMARS M142" sistemlərinə quraşdırılır. Hər bir mobil buraxılış qurğusu iki "PrSM" raketi daşıya bilir.

Məryəm Quliyeva