İsrail Müdafiə Qüvvələri (ÇAXAL) radikal HƏMAS hərəkatının "Qəzza" şəhər briqadasının əməliyyat şöbəsinin rəisi, 7 oktyabr 2023-cü ildə İsrail ərazisinə hücumda və girovların saxlanılmasında iştirak etmiş şəxsi ləğv edib.

Xalqcebhesi.az xəbər verir ki, bu barədə ordunun mətbuat xidməti məlumat verib.

"İsrail Müdafiə Qüvvələri HƏMAS-ın "Qəzza" briqadasının əməliyyat şöbəsinin rəisi Adam İbrahim Şaaban Nəsmanı ləğv edib. O, 7 oktyabrda bu briqadanın terrorçularının İsrailə sızmasına rəhbərlik edib və girovları saxlayıb", — deyə bəyanatda bildirilir. Mətbuat xidmətindən qeyd olunub ki, Nəsman Qəzza şəhərində endirilən zərbə nəticəsində məhv edilib.

Ordu mətbuat xidmətinin məlumatına görə, ləğv edilən şəxs "HƏMAS-da bir sıra rəhbər vəzifələr tutub, o cümlədən HƏMAS-ın Qəzzadakı briqadasının kəşfiyyat zabiti və "Əl-Şati" batalyonunun komandiri olub, həmçinin "Nuxba" xüsusi təyinatlı qüvvələrinin batalyonuna komandirlik edib". Nazirlikdən əlavə edilib ki, "son aylarda Nəsman HƏMAS-ın Qəzza şəhər briqadasının terrorçularına təlim keçməyə çalışıb", həmçinin "atəşkəs razılaşmasını pozaraq HƏMAS-ın hərbi potensialını bərpa etmək cəhdləri göstərib".

Məryəm Quliyeva