ARDNF Türkiyədə daşınmaz əmlak almaq niyyətindədir İqtisadiyyat

ARDNF Türkiyədə daşınmaz əmlak almaq niyyətindədir

Şahmar Mövsümov: "Devalvasiya ilə bağlı söhbətlərdən spekulyantlar qazanır"

Azərbaycan Dövlət Neft Fondu (ARDNF) xarici ölkələrdə daşınmaz əmlaka investisiya yatırmaq üçün müxtəlif variantları nəzərdən keçirir. "APA-Economics" xəbər verir ki, bunu fondun icraçı direktoru Şahmar Mövsümov bildirib. "Türkiyə bazarı bizim üçün maraqlıdır, variantları nəzərdən keçiririk. Yaxşı imkanların olduğu ölkələr daim diqqətimizdədir", - deyə Ş. Mövsümov qeyd edib.
"Devalvasiya ilə bağlı söhbətlər sırf ajiotajdır və bunun nəticəsində spekulyantlar qazanır". Bunu Şahmar Mövsümov bildirib. "Bu gün çox sayda insan manatı yüksək məzənnə ilə dollara dəyişir. Sonra ona manat lazım olanda, aşağı məzənnə ilə dollar satır. Nəyə görə? Kimdənsə eşidib ki, devalvasiya olacaq. Nəticədə isə vətəndaş itki ilə üzləşir. Devalvasiya ilə bağlı söhbətlər sırf ajiotajdır və bunun nəticəsində spekulyantlar qazanır. Heç zaman hansısa valyutanın ardınca qaçmaq lazım deyil. Bu cür əməliyyatlar yüksək riskli spekulyativ əməliyyatlar sayılır. Bu əməliyyatlar nəticəsində qazanc əldə etmək olduqca çətindir. Bunu yalnız çox yüksək səviyyədə biliklərə malik olan treyderlər edə bilərlər, lakin onlar da çox vaxt itki ilə üzləşirlər. Hansı valyutada qazanc əldə edirsinizsə, o valyutada da xərcləmək lazımdır", - deyə icraçı direktor qeyd edib.