"Azərenerji" ASC 2 000 meqavata yaxın bərpa olunan enerji güclərinin ölkənin enerji sisteminə inteqrasiya olunması üçün müvafiq işlər aparır.

Bu barədə "APA-Economics"ə açıqlamasında energetika nazirinin müavini Elnur Soltanov deyib.

Onun sözlərinə görə, hazırda ölkə üzrə bərpa olunan enerji sahəsində 2 QVt-a yaxın gücündə 8 layihə həyata keçirilir və bu güclərin respublikanın enerji sisteminə inteqrasiyası üçün sistem operatoru olan "Azərenerji" tərəfindən yeniliklər və modernizasiya işləri aparılır.

""Azərenerji" sistemdə yeniliklər və modernizasiya aparır ki, bu qədər əlavə bərpa olunan enerjinin sistemə inteqrasiya edilməsini təmin edə bilsin", - Elnur Soltanov qeyd edib.

Nazir müavini onu da əlavə edib ki, bərpa olunan enerji güclərini inteqrasiyası çərçivəsində hazırda Dünya Bankı ilə müzakirələr davam etdirilir ki, enerji sistemində yeni yarımstansiyalar, xətlər qurulsun.

Bununla yanaşı Elnur Soltanov bildirib ki, hazırda Azərbaycanda ilk dəfə sənaye miqyaslı batareya sisteminin qurulması üçün şirkətin müəyyən edilməsi işləri aparılır.