Dünya Bankının "Doing Business 2019" hesabatının nəticələri Azərbaycan iqtisadiyyatının bugünkü vəziyyətinə verilən obyektiv qiymətdir.
Bunu iqtisadiyyat nazirinin müavini Sahib Məmmədov deyib.
Onun sözlərinə görə, beynəlxalq ekspertlər və maliyyə strukturları tərəfindən edilmiş təhlil real göstəricilərə əsaslanır və Azərbaycan iqtisadiyyatının nəzərəçarpan artımını əks etdirir:
"Azərbaycan iqtisadiyyatının yaxşılaşdırılmış göstəriciləri ölkədə reallaşdırlmış uğurlu islahatların və hökumətin düşünülmüş iqtisadi siyasətinin nəticəsidir. Hazırda kişik və orta sahibkarlığın inkişafı Azərbaycanda dövlət siyasətinin prioritetlərindən biridir. Son illərdə ölkədə qeyri-neft sektorunun keyfiyyətcə yeni səviyyəyə çıxarılmasına yönəlmiş genişmiqyaslı iş aparılır".
Nazir müavini qeyd edib ki, Azərbaycanda sahibkarlığa dəstək göstərilməsi və biznes mühitinin yaxşılaşdırılması üçün Kiçik və Orta Biznesin İnkişafı Agentliyi yaradılıb:
"Bu qurum sahibkarlara mərhələli şəkildə yardım göstərir. Paralel olaraq biznes sahəsində fəaliyyət göstərən vətəndaşların maarifləndirilməsi üzrə iş aparılır, onlara güzəştli kreditlər verilir və digər xidmətlər göstərilir. Bir sözlə, Azərbaycanda biznes mühitinin yaxşılaşdırılması üçün bütün şərtlər yaradılır".
Qeyd edək ki, Azərbaycan Dünya Bankının "Doing Business-2019" reytinqində 190 ölkə arasında 25-ci yerdə qərarlaşıb. Bundan əvvəlki hesabatda ölkəmiz 57-ci yerdə idi.