"Fitch Ratings" beynəlxlaq reytinq agentliyi Türkiyənin xarici və yerli valyutada emitentin uzunmüddətli defolt reytinqini (IDR) "BB-"dən "B+"a endirib. Reytinq üzrə proqnoz isə "mənfi" təsdiqlənib.

"APA-Economics"in agentliyə istinadən verdiyi məlumata görə, xarici və yerli valyutada qısamüddətli IDR "B" səviyyəsində təsdiq olunub. Uzunmüddətli reytinqin sözügedən səviyyəyə endirilməsi yüksək inflyasiya, aşağı xarici likvidlik və ölkə siyasətinə zəif inamı əks etdirir. "Fitch" inflyasiyanın qarşısını almaq üçün Türkiyə tərəfindən görülən tədbirlərin makroiqtisadi və maliyyə sabitliyi risklərinin davamlı şəkildə azaldılması ilə nəticələnəcəyini gözləmir.
Agentlik qeyd edir ki, yumşaq monetar siyasət inflyasiyanı yüksək səviyyədə saxlaya, zəif lirənin və yüksək inflyasiyanın fiskal göstəricilərə təsirlərini gücləndirə və nəticədə ölkənin beynəlxalq ehtiyatlarına təzyiq göstərə bilər.