"Dünyada nifrətin artdığını görürük. Belə şəraitdə dinlərarası dialoqdan danışmaq çətindir. Bunun səbəbi bir-birimizdən uzaqlaşmaqdır". Bunu V Bakı Beynəlxalq Humanitar Forumunun plenar iclasında çıxış edən Xorvatiyanın sabiq prezidenti Stepan Mesiç söyləyib.
Xorvatiyanın sabiq prezidenti qeyd edib ki, beynəlxalq kommunikasiyanın inkişaf etdiyi bir dövrdə müxtəlif xalqlar şovinist, millətçilik əhval-ruhiyyəsinə bürünür: "Dinlərarası və mədəniyyətlərarası dialoqun təşviqində jurnalistikanın rolunu xüsusi qeyd etmək istəyirəm. Mən prezident olduğum dövrdə qondarma jurnalistlərin dinlərəarası və mədəniyyətlərarası dialoqa nə qədər ziyan vurduğunu görürdüm. Mən indi əsl jurnalistikadan danışmaq istəyirəm. Bu gün sosial şəbəkələrdə bəzi reklamçılar, hətta bəzi siyasətçilər özlərini bir məhsul kimi cəmiyyətə satmaq istəyirlər. Əsl jurnalistika isə insanları bir-birinə yaxınlaşdırmalıdır. Mən prezident olduğum dövrdə əcnəbilərin daha çox Xorvatiyaya gəlməsini, xorvatların xarici ölkələrə getməsini təşviq edirdim. Çünki insanlar ölkələrə getdikcə həqiqətləri özləri daha çox görürlər".
"Qərbdə elə bir jurnalistika yaradılıb ki, yalnız sözdə müstəqildir. Ancaq o jurnalistlər sahiblərindən daha çox əziyyət çəkir. Məsələn, BBC telekanalı Hələbdə durumun faciəli olduğunu, Rusiya telekanalı isə Hələbə humanitar yardımın gəlməsini göstərir. Əsl müstəqil jurnalistika hər iki halı işıqlandırardı. Təəssüf ki, bu gün belə jurnalistika cəmiyyəti manipulyasiya etməyə çalışır. Məsələn, Liviya hadisələri zamanı hadisələr bir rakursdan göstərirdi"-deyə, o əlavə edib.
S. Mesiç bildirib ki, Suriyada legitim hakimiyyətə qarşı beynəlxalq ictimaiyyətdə nifrət yaradılması üçün hətta 5 yaşlı uşaqlardan belə təbliğati məqsədlə istifadə edilməsi hallarına rast gəlinir: "Mən ləyaqətli jurnalistikanın təşviqinə çağırıram. Mən jurnalistlərə azadlığın qaytarılmasını tələb edirəm. Yuqoslaviya bu yaxınlara qədər vahid dövlət idi, sonra qanlı savaş oldu, dövlətlər ayrıldı. Bu qanlı savaşın təməlini siyasətçilərin sifarişi ilə jurnalistlər hazırladı. Biz bu gün Hamiltonun sivilizasiyaların toqquşması nəzəriyyəsinin praktikada şahidi oluruq. Din siyasətdən ayrı olmalıdır. Jurnalistika ilə isə peşəkar insanlar məşğul olmalıdır".