Bakıda keçiriləcək BMT-nin İqlim Dəyişmələri üzrə Tərəflər Konfrasının 29-cu sessiyasında əsas hədəf Paris Razılaşmasının bütün müddəaları üzrə iqlim dəyişikliyi ilə effektiv mübarizə aparılması yollarını müəyyənləşdirməkdən, eləcə də bu istiqamətdə konsensus əldə etməkdən ibarətdir".

APA xəbər verir ki, bunu Bakıda keçirilən İtki və Zərərə cavab verən Fondun İdarə Heyətinin 3-cü iclasında COP29-un müəyyən edilmiş prezidenti, Azərbaycanın ekologiya və təbii sərvətlər naziri Muxtar Babayev bildirib.

Onun sözlərinə görə, konfransın iştirakçısı olan tərəflər iqlim dəyişikliyinin ayrı-ayrı ölkələrə vurduğu zərərlərin aradan qaldırılmasının yollarını da müzakirə edəcəklər.

M. Babayev onu da vurğulayıb ki, bu ay açıqlanan hesabata görə, təkcə Afrika ölkələri iqlim dəyişikliyi problemi nəticəsində ümumdaxili məhsulun 5 faizə qədəri həcmində itkiyə məruz qalır:

"Bir həqiqət məlumdur ki, iqlim dəyişikliyi nəticəsində insan itkilərinin təsiri digər faktorlarla müqayisədə daha çoxdur. Bir müddət əvvəl baş vermiş qasırğanın Asiya regionunun müxtəlif nöqtələrində insanların faciəvi ölümünə səbəb olduğunu xatırlamaq bu fəsadları anlamaq üçün kifayət edir".

Nazir xatırladıb ki, bir qədər əvvəl Ümumdünya Meteorologiya Təşkilatı Afrika regionu ölkələrinin iqlim dəyişikliyi səbəbindən ümumdaxili məhsulun 5 faizi həcmində itkiyə məruz qaldığını diqqətə çatdırıb:

"Kiçik ada dövlətlərində isə bu göstərici 2,1 faiz təşkil edir. Bu yaxınlarda Filippin Prezidenti iqlim dəyişikliyinin vurduğu zərərin kompensasiyası üçün fondun yaradılması barədə qərar imzalayıb. Biz bu addımı yüksək qiymətləndiririk. COP29 çərçivəsində iqlim dəyişikliyinin aradan qaldırılmasının maliyyələşdirilməsi məsələsinin həll edilməsi mühüm addım olacaq. Bizim bunun üçün qarşıda 54 günümüz var".