Akademik İbrahim Cəfərov,
Bitki Mühafizə və Texniki Bitkilər Elmi-Tədqiqat İnstitunun direktoru

Azərbaycan xalqı Ulu Öndər Heydər Əliyevin anım gününü dərin ehtiramla yad edir. Lakin bu xatırlama yalnız tarixə ehtiram deyil, Azərbaycanın müasir dövlətçilik fəlsəfəsinin mahiyyətinə, inkişaf yolumuza və milli kimliyimizin formalaşmasına yenidən nəzər salmaq deməkdir. Çünki Heydər Əliyev şəxsiyyəti təkcə siyasi lider kimi deyil, bütöv bir dövrün memarı, xalqın milli intibahını təmin edən elmi-siyasi düşüncə məktəbinin müəllifi kimi tarixə həkk olunub.
Heydər Əliyev dövlətçilik ideyasını strateji konsepsiyaya çevirən lider idi.
Müstəqilliyin ilk illərində Azərbaycan yalnız siyasi deyil, intellektual təlatümlər dövründən keçirdi. Belə bir zamanda Heydər Əliyevin hakimiyyətə qayıdışı dövlət idarəçiliyinə sistemli yanaşmanı, elmi əsaslara söykənən inkişaf modelini, milli maraqları prioritetləşdirən strateji xətti formalaşdırdı. Onun dövlətçilik fəlsəfəsinin əsas məğzi milli maraqlara söykənən rasional düşüncə, idarəetmədə sabitlik və uzunmüddətli inkişaf konsepsiyası idi.
Bu gün Azərbaycan akademik dairələrində Heydər Əliyevin siyasi irsinə tədqiqat predmetindən daha çox, dövlətçilik modeli kimi yanaşılır.
Heydər Əliyevin fəaliyyətində mədəniyyət, tarix və təhsil sahələri xüsusi önəm daşıyırdı. O, milli yaddaşın gücləndirilməsini dövlət quruculuğunun ayrılmaz hissəsi kimi təqdim edir, xalqın öz kimliyinə sahib çıxmasını strateji məsələ hesab edirdi. Bu gün elm, təhsil və mədəniyyət sahələrində görülən genişmiqyaslı işlər həmin düşüncənin davamıdır.
Akademik baxışdan yanaşdıqda, Heydər Əliyev modeli milli ideologiyanın yaradılması prosesini dövlətin intellektual potensialının inkişafı ilə uzlaşdıran nadir nümunədir.
Bu gün Azərbaycanın siyasi sabitliyi, güclü iqtisadiyyatı, regional liderliyi və qlobal miqyasda nüfuzunun artması Ulu Öndərin qoyduğu elmi əsaslandırılmış inkişaf xəttinin məntiqi davamıdır. Prezident İlham Əliyevin rəhbərliyi ilə həyata keçirilən siyasət də məhz Heydər Əliyevin ideyalarına əsaslanaraq yeni mərhələyə yüksəlib.
Heydər Əliyevin xatirəsini anmaq, əslində, bir xalqın öz dövlətçilik yoluna, öz milli yaddaşına və öz strateji perspektivinə sədaqətini ifadə etməkdir. Akademik ictimaiyyət üçün bu gün, ilk növbədə, Ulu Öndərin ideyalarının elmi baxımdan təhlili və gələcək nəsillərə ötürülməsi baxımından xüsusi əhəmiyyət daşıyır.
Bu gün biz Ulu Öndəri yalnız böyük siyasi lider kimi deyil, milli inkişafın nəzəri əsaslarını yaradan, dövlətçilik məktəbini formalaşdıran tarixi şəxsiyyət kimi anırıq.