Spaceweather: AR 14100 adlı günəş ləkəsi ulduzun səthində demək olar ki, iki aydır mövcuddur.

Xalqcebhesi.az xəbər verir ki, kosmik hava şəraitini müşahidə edən alimlər, AR 14100 adlı nəhəng günəş ləkəsinin qeyri-adi davamlılığına heyrətlə baxırlar. Bu “ulduz veteranı” ilk dəfə 5 aprel tarixində AR 14055 nömrəsi ilə müşahidə olunub və o vaxtdan bəri alimləri öz davamlılığı ilə təəccübləndirməkdə davam edir. Bu barədə Spaceweather portalı məlumat yayıb.

Adətən günəş ləkələri bir həftədən artıq yaşamır, lakin AR 14100 istisnai sabitlik nümayiş etdirir. May ayının əvvəlində, AR 14079 nömrəsini daşıyarkən, bu ləkənin diametri 140 min kilometrə çatmışdı – bu, Yer kürəsindən 11 dəfə böyükdür. Hazırda ölçüsü demək olar ki, iki dəfə kiçilib, amma fəallığını hələ də saxlayır.

Günəş ləkələrinin ömrü üzrə tarixi rekord 1919-cu ilə məxsusdur — o dövrdə bir ləkə 134 gün mövcud olub. AR 14100 bu rekordu qırmaq üçün daha 2-3 ay yaşamalıdır.

Günəş ləkələri, güclü maqnit sahələrinin Günəşin səthindən keçərək nisbətən soyuq sahələr yaratması nəticəsində yaranır. Hazırda Günəş öz 11 illik aktivlik dövrünün zirvəsindədir ki, bu da ləkələrin sayının artmasını izah edir.

Cari dövr gözləntilərdən qat-qat aktiv olub — 2024-cü ilin avqustunda rekord qeydə alınıb: bir sutkada 337 ayrı-ayrı günəş ləkəsi müşahidə olunub. AR 14100 artıq bir neçə günəş alışması (partlayışı) yaradıb, lakin alimlər bildirirlər ki, ləkənin ölçüsü onun Yer üçün təhlükəsini mütləq şəkildə göstərmir.

Hazırda AR 14100 Günəş diski üzərində yavaş-yavaş hərəkət etməyə davam edir və alimlər maraqla izləyirlər ki, bu qeyri-adi fenomen kosmik meteorologiya tarixində iz buraxa biləcəkmi.

Məryəm Quliyeva