Avropa Parlamenti bu həftə Srebrenitsa soyqırımının 30-cu ildönümünü qeyd etmək üçün iyulun 7-də dinləmələr keçirib.

“Report”un Avropa bürosunun verdiyi məlumata görə, Avropa Parlamentinin sədri Roberta Metsola İkinci Dünya müharibəsindən sonra Avropada ən böyük qırğın olan faciəli hadisələrin unudulmamasına çağırış edib.

Daha sonra çıxış edən bütün siyasi qrupların nümayəndələri belə bir hadisənin bir daha təkrarlanmaması üçün mümkün olan hər şeyi etməyə çağırıblar.

Bununla yanaşı, bir çox natiqlər humanitar böhranın davam etdiyi Qəzzada faciəli hadisələrə diqqət yetirməyə çağırış ediblər.

Xatırladaq ki, Srebrenitsa qətliamı 1995-ci ilin iyulunda baş verib, təxminən 8 min bosniyalı müsəlman Bosniya serb ordusu tərəfindən öldürülüb. 2007-ci ildə Beynəlxalq Ədalət Məhkəməsi Srebrenitsadakı vəhşilikləri soyqırımı kimi qiymətləndirib.

Bosniya serb ordusunun komandiri Ratko Mladiç 2017-ci ildə BMT hakimlərinin onu soyqırımı, insanlığa qarşı cinayət və müharibə cinayətlərində təqsirli bilməsindən sonra ömürlük həbs cəzasına məhkum edilib.