Meksika, aralarında narkokartel üzvlərinin də olduğu cinayət təşkilatlarına mənsub 37 nəfərin mühakimə olunmaq üçün ABŞ-a göndərildiyini açıqlayıb.

Xalqcebhesi.az xəbər verir ki, Meksikanın təhlükəsizlik naziri Omar Qarsia Harfuch ABŞ mərkəzli "X" sosial şəbəkəsində verdiyi açıqlamada ABŞ-a göndərilən 37 nəfəri “ölkənin təhlükəsizliyi üçün təhdid yaradan şəxslər” kimi xarakterizə edib.

Qarsia Harfuch bildirib ki, sözügedən şəxslər 7 müxtəlif hərbi hava gəmisi ilə Vaşinqton, Hyuston, Nyu-York, Pensilvaniya, San Antonio və San Dieqoya göndərilib.

O, bu şəxslər barəsində ölüm cəzası tələb olunmaması ilə bağlı öhdəlik verildiyini qeyd edib. Nazir əlavə edib ki, bu transferlə birlikdə ABŞ prezidenti Donald Trampın ikinci prezidentlik dövrü ərzində ABŞ-a göndərilən “ağır cinayətkarların” sayı 92-yə çatıb.

ABŞ-a göndərilənlər arasında terror təşkilatına dəstək vermək ittihamı ilə ABŞ-da mühakimə olunacaq ilk Meksika vətəndaşı olacaq Maria del Rosario Navarro Sançes, eləcə də “Sinaloa Karteli”, “Los Beltran Leyva Karteli”, “Xalisko Yeni Nəsil Karteli” və “Şimal-Şərq Karteli” adlı narkokartel və cinayət qruplaşmalarının üzvləri də var.

Məryəm Quliyeva