Pentaqon Rusiyanın ehtimal olunan reaksiyası səbəbindən Almaniyaya "Tomahawk" qanadlı raketlərinin tədarükünün ləğv edilməsi imkanını nəzərdən keçirir.

Xalqcebhesi.az xəbər verir ki, bu barədə "Politico" qəzeti iki avropalı və bir amerikalı məmura istinadən məlumat yayıb.

"Pentaqonun Almaniyaya "Tomahawk" raketlərinin göndərilməsi planını qismən Rusiyanın bunu eskalasiya kimi qəbul edəcəyi narahatlığına görə ləğv edəcəyi gözlənilir. Bu, Amerikanın ən böyük müttəfiqlərindən biri ilə uzun müddətdir planlaşdırılan razılaşmaya münasibətdə təəccüblü bir geri dönüş olacaq", — deyə məqalədə bildirilir.

Qəzetin mənbələrinin sözlərinə görə, ABŞ rəsmiləri bu raketlərin tədarük ediləcəyi təqdirdə Rusiya tərəfinin cavab tədbirləri görəcəyindən ehtiyat edirlər. Bundan əlavə, onlar ABŞ və İran arasındakı müharibə fonunda ölkənin silah ehtiyatlarının azalmasından narahatdırlar.

"Politico" qeyd edib ki, bu addım ABŞ-ın NATO-dakı iştirakının daha geniş miqyasda azaldılmasının, o cümlədən minlərlə amerikalı hərbi qulluqçunun Almaniyada yerləşdirilməsinin ləğv edilməsinin bir hissəsidir.

Məryəm Quliyeva