ABŞ Prezidenti Donald Tramp Amerika televiziya şəbəkələrinin tətbiq etdiyi embarqoya cavab olaraq öz platforması olan "Trump TV"-ni yaratdı. Bazar ertəsi axşam saatlarında kanalın fasiləsiz yayımı başladı. Ağ Ev hökumət bəyanatlarını və keçmiş hadisələrin icmalını təqdim edən bu kanalın sutkada 24 saat fəaliyyət göstərdiyini açıqladı.

Xalqcebhesi.az xəbər verir ki, bazar ertəsi axşam Ağ Ev "Trump TV" adlı onlayn yayım kanalını işə saldı. Bildirildi ki, kanal həftənin 7 günü, günün 24 saatı ərzində "seçilmiş videoları, əsas bəyanatları, qaçırılmamalı məqamları və operativ yenilikləri" yayımlayacaq.
Kanal yayımına başlayanda efirdə Trampın iyulun 3-də Raşmor dağında (Mount Rushmore) etdiyi çıxışın arxiv kadrları nümayiş olunurdu.
ABŞ-ın əsas televiziya şəbəkələri — o cümlədən NBC, ABC, CBS, Fox News, CNN, Politico və MS Now — prezidentin brifinqlərinə buraxılmamalarına etiraz olaraq dünən Ağ Evdən televiziya yayımlarını dayandırmaq qərarına gəldilər.
Kənarlaşdırılan üç media qurumu Ağ Evdəki hadisələri işıqlandırmaq hüququnu bərpa etmək məqsədilə dünən Vaşinqtondakı federal apellyasiya məhkəməsinə iddia ərizəsi verdi.
Şənbə günü ABŞ Prezidenti Donald Trampın göstərişinə əsasən, Ağ Evin təhlükəsizlik xidməti sözügedən üç media qurumunun jurnalistlərinin binaya girişinə mane oldu.
Qərarı öz şəxsi platformasındakı mesaj vasitəsilə açıqlayan ABŞ Prezidenti Donald Tramp bildirdi ki, bu media qurumları davamlı olaraq "saxta xəbərlər" yaydıqları üçün kənarlaşdırılıblar.
ABŞ Prezidenti Donald Tramp mesajında ​​prezident, hökumət və Birləşmiş Ştatlar haqqında əsassız iddiaların və yalanların davamlı şəkildə yayılmasının qəbuledilməz olduğunu vurğuladı.

Məryəm Quliyeva