"Rusiya və AB Gömrük İttifaqı və "Şərq tərəfdaşlığı"nı bir-birinə uyğunlaşdırmağa cəhd etməlidir"

"Rusiya və Avropa Birliyi qarşıdurma məntiqindən imtina etməli, Gömrük İttifaqı və "Şərq tərəfdaşlığı"nı bir-birinə uyğunlaşdırmağa cəhd etməlidirlər". APA-nın Moskva müxbirinin verdiyi məlumata görə, bunu Moskva Karnegi Mərkəzində çıxışı zamanı Avropa Birliyinin Rusiyadakı nümayəndəliyinin rəhbəri Viqaudas Uşaskas deyib.
O bildirib ki, Avropa Birliyi əməkdaşlıq üçün konkret addımlar atmaqda maraqlıdır: "Biz, Lissabondan Vladivostoka qədər olan ümumi məkanda real əməkdaşlıq nümunəsi yaratmaqda maraqlıyıq. Əgər bunların reallığa çevrilməsini istəyiriksə, onda qarşıdurma məntiqindən imtina etməliyik və "Şərq tərəfdaşlığı" ilə Gömrük İttifaqının bir-birinə uyğunlaşdırılması üçün nə edə biləcəyimizə baxmalıyıq".
V. Uşaskas qeyd edib ki, heç kəs Ukraynanı Rusiya ilə ticarət müqaviləsini ləğv etməyə məcbur etmir: "Avropa Birliyi və Moldova, Gürcüstan və Ukrayna arasında assosiasiya haqqında saziş və azad ticarət müqaviləsi Rusiyanın bu ölkələrlə mövcud olan ticarət müqavilələri ilə tamamilə uyğundur".
Avropalı diplomatın sözlərinə görə, Avropa əvvəlki kimi Ukrayna ilə assosiasiya sazişi və azad ticarət zonası haqqında müqaviləni imzalamağa hazırdır: "Ukrayna buna hazır olan kimi, bu, baş tuta bilər".