Milli Məclisin deputatı Jalə Əliyevanın təşəbbüsü ilə keçirilən gənclərin üçüncü Ümumrespublika Teatr Festivalı final mərhələsinə çatıb.
Bakı, Ucar, Naxçıvan, Şamaxı və İmişlini təmsil edən 120-yə yaxın gənc yaradıcı kampda, təlimlərdə, fikir laboratoriyasında və məşqlərdə iştirak etmək üçün Gənclər və İdman Nazirliyinin Şüvəlanda yerləşən düşərgəsinə toplaşıb. Art–kampın keçirilməsində məqsəd gənclər arasında həm ünsiyyətin, həm də yaradıcı münasibətlərin formalaşmasına yardımçı olmaqdır.
Tanınmış sənət adamları – Azərbaycan Şaiq adına Azərbaycan Dövlət Kukla Teatrının baş rejissoru Qurban Məsimov, əməkdar artistlər Firdovsi Atakişiyev, Nofəl Vəliyev, rejissor Cavid Təvəkkül, Azərbaycan Dövlət Yuğ Teatrının direktoru Tərlan Rəsulov 3 gün ərzində gənclərə teatr sənəti ilə bağlı bir çox incəlikləri açıqlayıblar. Mükəmməl teatr sənəti ilə məşğul olmaq üçün məktəb və peşəkarlığin vacib olduğunu diqqətə çatdıran sənətçilər ustad dərslərini əvvəlcə gənclərlə dialoq üzərində qurublar. Bir fikir xüsusi vurğulanıb ki, əsl aktyor olmaq üçün 3 şərt vacibdir: Allah vergisi olan istedad, onu cilalamaq üçün çəkilən zəhmət və şans. Müxtəlif sualları cavablandıran sənətçilərin köməyi ilə gənc aktyor və rejissorlar improvizə olunmuş səhnəciklər – etüdlər quraraq, tərəf-müqabili anlamaq, hiss etmək üçün hansı texnikaların daha təsirli olduğunu sınayıblar. Ustad dərslərində əsas fabula - "Sənətdə bəzən söz o qədər də önəmli olmur. Baxışlar, hisslər, gözlər daha çox şey ifadə edir" fikri olub.
Martın 30-dan etibarən Bakıdan 8 peşəkar və həvəskar teatr nümayəndələri, habelə Şamaxı, Ucar, İmişli, Naxçıvanı təmsil edən 4 truppa "ağ ölüm" adlandırılan bəlanı cəmiyyətdən, xüsusilə də gənclərimizdən uzaq tutmağın yollarını göstərən 12 tamaşa ilə 3 gün ərzində Azərbaycan Dövlət Gənc Tamaşaçılar Teatrının səhnəsində çıxış edəcəklər. Hazırlanan tamaşaların mövzusu da sırf narkomaniya düşkünlüyünə, qanunsuz preparatların satışına etiraz ruhunda köklənib. Təsadüfi deyil ki, festivalın sloqanı olaraq, məhz "NARKOSTOP" seçilib.
Layihənin icraçı direktoru Sənan Əlləz, reallaşdıran təşkilat "BİZ – Biz inkişaf zamanındayıq", dəstəkçiləri Gənclər və İdman, Mədəniyyət və Turizm nazirlikləri, ASSİTEJ və sıra qurumlardır.