“Rusiya ilə danışıqlar aparılmalıdır” Siyasət

“Rusiya ilə danışıqlar aparılmalıdır”

Qüdrət Həsənquliyev: "Dağlıq Qarabağ probleminin həllində qarşı tərəf Ermənistan deyil, Rusiyadır"

"Azərbaycan Ordusunun 2-5 aprel uğurlu döyüş əməliyyatları: tamam, yoxsa davam?" mövzusunda tədbir keçirilib
Bu gün Qarabağ Azadlıq Təşkilatının (QAT) təşkilatçılığı ilə "Azərbaycan ordusunun 2-5 aprel uğurlu döyüş əməliyyatları: tamam, yoxsa davam?" mövzusunda tədbir keçirilib.
Tədbirdə çıxış edən QAT sədri Akif Nağı son hərbi əməliyyatları yüksək qiymətləndirib və Azərbaycan torpaqlarının yalnız müharibə yolu ilə işğaldan azad ediləcəyini diqqətə çatdırıb. O, Azərbaycan cəmiyyətinin də müharibəyə tam hazır olduğunu deyərək, Ermənistan tərəfinin son hadisələrdə təşvişə düşdüyünü və hərbi gücünün nə qədər zəif olduğunun aşkara çıxdığını vurğulayıb.
BAXCP sədri, Milli Məclisin deputatı Qüdrət Həsənquliyev çıxışında bildirib ki, Dağlıq Qarabağ probleminin həllində qarşı tərəf Ermənistan deyil, Rusiyadır və bu münaqişəni həll etmək üçün Rusiya ilə danışıqlar aparılmalıdır: "Biz yalnız Rusiya ilə danışıqlar apararaq Qarabağı işğaldan azad edə bilərik. Bir çox qonşu ölkələr bu 3 günlük müharibədə Azərbaycana dəstək verdi. İran dəstək versə də, yeni müharibə başlayacağı halda, bu ölkənin necə davranacağı, hansı mövqe tutacağı bəlli deyil. Ermənistanın son hərbi əməliyyatlar nəticəsində hansısa güzəştə gedəcəyini düşünmürəm".
Müsavat Partiyasının başqanı Arif Hacılı çıxışında bildirib ki, son hadisələr nəticəsində Dağlıq Qarabağ məsələsində Azərbaycanın mövqeyi güclənib: "Minsk Qrupu həmsədrləri bu münaqişə ilə bağlı indiyədək hər hansı dəyişikliyə nail ola bilməyib. Ona görə də biz təklif edirik ki, bu qrupun tərkibi yenidən formalaşdırılsın. Eyni zamanda GUAM birliyinin möhkəmləndirilməsi istiqamətində addımlar atılmalıdır. Hesab edirəm ki, son əməliyyatlar zamanı Azərbaycan cəmiyyəti birləşdi və ordumuza dəstək oldu. Bu, xalqımızın həmrəyliyi baxımından çox əhəmiyyətli oldu".
Milli Strateji Düşüncə Mərkəzinin sədri İsa Qəmbər qeyd edib ki, son hərbi əməliyyatlar onu göstərdi ki, Azərbaycan xalqı Qarabağı unutmayıb və torpaqlarımızın işğaldan azad edilməsi istiqamətində döyüşməyə hazırdır. O əlavə edib ki, son dövrlərdə həm də Qarabağla bağlı ümumi mövqe ortaya qoyulub: "Bu birlik cəmiyyətdə özünü göstərdi. Bütün siyasi təşkilatlar, cəmiyyət ordumuza dəstək verdi və bu proses davam edəcək".
Tədbir çıxışlarla davam edib.