Məlum olduğu kimi, Ermənistanın baş naziri Nikol Paşinyanın sentyabrın 8-də Moskvaya səfəri planlaşdırılır. Məhz bu səfər çərçivəsində Ermənistanın mövcud siyasi hakimiyyətinin anti-Rusiya xarakterli çıxışları köhnə sistemə bağlı olan siyasilər tərəfindən sərt şəkildə tənqid edilir, çoxsaylı ittihamlar irəli sürülür. Putin-Paşinyan görüşü qarşısında Respublika partiyasının iki aparıcı adamı – Eduard Şarmazanov və Armen Aşotyan sözügedən istiqamətdə Nikol Paşinyanın idarəçilik qabiliyyətinin olmadığını deyiblər.
Rusiyanın xarici işlər naziri Sergey Lavrovun "Ermənistan qaynayır" ifadəsinə qarşılıq olaraq, Nikol Paşinyanın "Hə, doğrudan da istidir" cavabı da köhnə sistemin tərəfdarları tərəfindən birmənalı qarşılanmayıb. Belə ki, Şarmazanov Paşinyanın bu cavabının ardınca, baş naziri ciddi olmağa dəvət edib. "Layk toplamaq üçün yumorlu bəyanatlar verməkdənsə, ciddi işlərlə məşğul olmaq lazımdır", deyə Eduard Şarmazanov bildirib: "Cənab Paşinyan, bu KVN (Şən və Hazırcavablar Klubu) deyil, ciddi erməni-rus münasibətləridir və hesab etmirəm ki, müttəfiq dövlətə belə bir yumorla cavab vermək lazımdır".
Şarmazanov əlavə edib ki, bu cür yumorlar Paşinyana baha başa gələ bilər.
Armen Aşotyan: "O, gah Moskvaya gedir və Rusiya Federasiyası ilə problemlər yaranır, gah Brüsselə gedir, orada da problemlər yaranır"
Armen Aşotyan isə öz növbəsində bəyan edib ki, Ermənistanın mövcud hökuməti ölkənin xarici siyasətini boşa xərcləyir: "Düşünürəm ki, Ermənistanın xarici siyasəti bahalı maşınla yenicə sürücülüyə başlamış sürücünün getdiyi yola bənzəyir. Kurs eynidir, ancaq sürücü həmin kursu tuta bilmir. O, gah Moskvaya gedir və Rusiya Federasiyası ilə problemlər yaranır, gah Brüsselə gedir, orada da problemlər yaranır".
Aşotyan da öz həmkarı Şarmazanov kimi hesab edir ki, Nikol idarə edə bilmir.
Bütün bunlar isə bir daha belə qənaətə gəlməyə zəmin yaradır ki, Ermənistanın baş naziri Nikol Paşinyan xarici siyasət məsələsində də digər sahələrdə olduğu kimi uduzur. Xüsusilə, Moskva səfəri öncəsində onun Ermənistanın müttəfiqi hesab edilən Rusiyanın XİN rəhbəri ilə ələsalma, yaxud yumor dilində danışması həqiqətən də ciddi fəsadlara səbəb ola bilər. Hətta görüşün ləğv edilməsi, ya da vaxtının dəyişdirilməsinə qədər...