“Rəsmi ideologiyadan üz döndərsək, Borisovun Rusiyanın imperiya siyasəti kontekstində çox təbii bir fikir açıqladığının şahidi olarıq. Moskva üçün KTMT və AİƏT postsovet məkanında təsirini rəsmiləşdirməyə çalışan vasitələrdir”.
Bunu erməni politoloq Sarqis Artsruni bildirib.
Bu yaxınlarda İrəvanda Kollektiv Təhlükəsizlik Müqaviləsi Təşkilatına (KTMT) üzv ölkələrin dövlətlərarası hərbi-iqtisadi iclasında iştirak edən Rusiya Baş nazirinin müavini Yuri Borisov, Rusiyanın Azərbaycanın KTMT-də müşahidəçi statusu alacağına qarşı olmadığını, əksinə təşkilatın Azərbaycanla əməkdaşlığı alqışlayacağını söyləyib.
“Moskva ilə Bakı arasındakı hərbi-texniki, siyasi, iqtisadi münasibətlər müttəfiq xarakterlidir və Moskva tərəfindən Bakının Avrasiya layihələrində iştirakının istənilən formatını məqbul hesab etdiyi təbii haldır. Heç bir şübhə yoxdur ki, gec-tez Bakı belə bir dəvət alacaq və bəlkə də erməni maraqları hesabına başqa bir Rusiya-Azərbaycan pərdəarxası razılaşmasının şahidi olacağıq”, - deyə erməni politoloq qeyd edib.
Onun sözlərinə görə, Ermənistan Azərbaycanın KTMT-də müşahidəçi statusuna qarşı çıxa bilər, lakin Ermənistanı kənara itələməklə, təşkilatın bütün üzvləri Azərbaycanın müraciətinə razı olduqda, “konsensus-mənfi Ermənistan” razılaşması da İrəvan üçün olduqca əlverişsiz və təhlükəli ola bilər.
“Əlbətdə ki, çaxnaşmaya düşmək və tələsik qərarlar qəbul etmək lazım deyil, ancaq KTMT-də olmağın və ya olmamağın dilemmasını məcbur edən fors-major vəziyyətlərə hazır olmaq lazımdır”, - deyə Artsruni qeyd edib.
O qeyd edib ki, KTMT Ermənistanın təhlükəsizliyinə zəmanət vermir.
“Azərbaycanın bu təşkilatda Ermənistandan daha çox təbii müttəfiqlərinin olduğunu qeyd etmək yersiz olmazdı. Rusiya və Belarusiyanın Azərbaycana silah satması və Qazaxıstanın da tez-tez Bakının əsas lobbiçisi kimi çıxış etməsi təsadüfi deyil. Başqa sözlə, KTMT Ermənistanın təhlükəsizliyi üçün ciddi təhdidə çevrilir.
Bu kontekstdə Ermənistan rəhbərliyi də fors-major vəziyyətlərə və prinsipal qərarlar qəbul edilməsinə hazır olmalıdır”, - deyə erməni politoloq qeyd edib.