“Ermənistan Rusiya-Türkiyə münasibətlərinin gərginləşməsində maraqlıdır” Siyasət

“Ermənistan Rusiya-Türkiyə münasibətlərinin gərginləşməsində maraqlıdır”

"Ermənistan rəhbərliyi Türkiyənin Rusiya ilə Qarabağ məsələsində razılığa gəldiyi barədə fikirlər səsləndirir və təşviş içindədir". Bunu politoloq İlqar Vəlizadə deyib. Politoloqun sözlərinə görə, Ermənistan tərəfi Türkiyə-Rusiya münasibətlərinin gərginləşməsindən istifadə etmək istəyirlər: "Hətta onlar bunu açıq şəkildə etmək istəyirlər. Bu yaxınlarda Ermənistanın keçmiş xarici işlər naziri Edvard Nalbandyan deyib ki, Türkiyəni ümumiyyətlə ATƏT-in Minsk Qrupundan çıxarmaq lazımdır. Yəqin Ermənistan rəhbərliyi ona işarə edir ki, Rusiya da bununla bağlı hansısa addım atsın. Çünki onların bunu etmək üçün gücləri yoxdur. Onlar hər vəchlə bütün imkanlardan istifadə edərək Türkiyəni ümumiyyətlə regiondan və yaxud da münaqişənin tənzimlənməsindən maksimum uzaqlaşdırmaq istəyirlər. Bu bir daha onu göstərir ki, Ermənistan yeganə real tərəfdir ki, Rusiya-Türkiyə münasibətlərinin gərginləşməsində maraqlıdır. Hətta deyərdim nəinki maraqlıdır, konkret əməli işlər aparmağa da hazırdır ki, bu münasibətlər daha da kəskinləşsin və dərinləşsin".