İyulun 22-də ABŞ-da koronavirusa 71 min 967 yoluxma halı qeydə alınıb, 1205 nəfər isə COVID-19 infeksiyası səbəbindən həyatını itirib. Virusa yoluxanların sayı 4 milyonu, ölənlərin sayı isə 146 mini ötüb.

AZƏRTAC pandemiyanın statistikasını aparan Worldometer saytına istinadla xəbər verir ki, ABŞ-da həm yoluxma, həm də ölüm hallarında bir gün əvvələ nisbətən artım olub. İyulun 21-də ölkədə koronavirusa yoluxanların sayı 67 min 479 nəfər, ölənlərin sayı isə 1165 nəfər idi.

Saytın Bakı vaxtı ilə bu gün saat 16:30-a olan məlumatına əsasən, COVID-19 pandemiyasının başlanğıcından bəri ABŞ-da 4 milyon 101 min nəfər yeni koronavirusa yoluxub, onlardan 146 min 192 nəfəri vəfat edib, 1 milyon 943 mindən çox xəstə isə sağalıb. Müalicəsi davam edən 2 milyon 11 min 613 xəstədən 19 min 179 nəfərin vəziyyəti ağır qiymətləndirilir. Ölkədə COVID-19 infeksiyasından sağalanlara nisbətdə ölənlərin sayı 7 faizdir.

Hazırda dünya üzrə COVID-19 infeksiyasına yoluxma və ölüm hallarının təxminən dörddəbiri Birləşmiş Ştatların payına düşür.