Miyanəli bir ailənin hüquqi mübarizəsi nəticəsində Vətəndaşlıq Vəziyyəti Aktlarının Qeydiyyatı İdarəsi 7 aydan sonra uşağın adını şəxsiyyət vəsiqəsində (şəhadətnamədə) "İlyar"dan "Əlyar"a dəyişdirməyə məcbur olub.

Gunaz.tv

Uşağın valideynləri Zəhra və Səid Abdullahi-Rad bu barədə Balamın Adı kampaniyasına və Dan səhifəsinə bildiriblər:

"Oğlumuz 30 dekabr 2025-ci ildə dünyaya gəldi və biz ona Əlyar (ELYAR) adını qoyduq. Lakin Miyanə Qeydiyyat İdarəsinin əməkdaşları bu adı qeydiyyata almaqdan imtina etdilər və bizim iradəmizin əksinə olaraq onu İlyar (ILYAR) kimi qeydiyyata aldılar.

Onlar bildiriblər ki, Balamın Adı kampaniyasının dəstəyi ilə iyun 2026-ci ildə Qeydiyyat İdarəsinə qarşı məhkəmə iddiası qaldırıblar.

İddia ərizəsində qeyd olunub:

"Qeydiyyat İdarəsi sistemdə həmzəli adların qeydiyyatının mümkün olmadığını əsas gətirərək övladımıza 'Əlyar' adı ilə doğum haqqında şəhadətnamə verməkdən imtina edib. Halbuki eyni sistemdə 'Faizə', 'Faiqə' və 'Maidə' kimi həmzəli, lakin qeyri-türk mənşəli adlar rəsmi şəkildə icazəli adlar kimi qeydiyyata alınır və onlar üçün heç bir problem olmadan sənəd verilir.

'Əlyar' türk dili və mədəniyyətində 'elin, tayfanın və ailənin dostu və dayağı' mənasını daşıyır və aydın, gözəl məzmuna malikdir. Lakin 'İlyar' sözü 'ilin dostu' mənasını verir ki, bu da nə qəbul olunmuş, nə də bizim nəzərdə tutduğumuz mənadır. Bu məcburi dəyişiklik seçdiyimiz adın təhrif edilməsindən əlavə, gələcəkdə övladımız üçün müxtəlif problemlər yarada bilər.

Valideynlər həmçinin əvvəllər "Əlyar" adı ilə verilmiş iki doğum haqqında şəhadətnamənin surətini də məhkəməyə təqdim ediblər.

Nəticədə Miyanə şəhərinin Sülh Məhkəməsinin 4-cü şöbəsi Qeydiyyat İdarəsinin əleyhinə qərar çıxarıb və qurumu uşağa "Əlyar" adı ilə rəsmi sənəd verməyə məcbur edib.