Ötən il dekabrın 23-də fəaliyyətə başlayan metronun "Xocəsən" stansiyasına bu günə qədər 50 min 660, yaxud orta statistik hesabla gün ərzində 1634 sərnişin daxil olub.

Trend-in sorğusuna cavab olaraq bu barədə Bakı Metropoliteni" Qapalı Səhmdar Cəmiyyətindən bildirilib.

Qeyd edilib ki, ümumən bir stansiyanın sabit sərnişin kontingentinin formalaşması bir neçə ay davam edən prosesdir. "Bu, həmin istiqamətdə hərəkət edən insanların, əsasən, gündəlik nəqliyyat prioritetləri sırasında metropolitenin yerindən və stansiya istismara verildikdən sonra nəqliyyat infrastrukturunda müvafiq inteqrasiya məsələlərindən çox asılı olur.

Bir ay ərzində stansiyaya ən çox sərnişinin daxil olduğu gün 2022-ci ildə fəaliyyət göstərdiyi 9 gün ərzində 2564 nəfər (27 dekabr) olub. 2023-cü ildə isə yanvar ayının 9-u qarlı-şaxtalı hava şəraitinin ən sərt günündə olub – 2763 nəfər", - açıqlamada deyilir.

Qeyd edək ki, 2022-ci il 23 dekabrda Bakı Metropoliteninin “Xocəsən” stansiyası və “Xocəsən” elektrik deposu istifadəyə verilib.

“Xocəsən” stansiyası Bənövşəyi xətt üzərində yerləşən dördüncü stansiyadır. Kompleksin ümumi sahəsi 4200 kvadratmetr, stansiya platformasının uzunluğu 144 metrdir.